Barak Valley hmasawn nan skill development a pawimawh: Sonowal

Union Minister for Sports and Youth Affairs, Sarbananda Sonowal chuan skill development chu Barak Valley mipuite hmasawnna tur kawng pawimawh tak a ni, tiin Barak Valley leh Haflong-a skill development centre hawng turin Union Ministry of Skill Development-ah ngen a tum thu a sawi.

‘Skilled Youth, Empowered Assam’ tih thupui hmanga Nehru Yuva Kendra Sangathan (NYKS)-in Silchar Town Club muala ṭhalai leh zirlaite tan inkhawmpui a buatsaihah Sonowal chuan he thu hi a sawi a, ṭhalaite thiamthil tuaihriamsak chu hmalam huna ei leh bara India dinhmun chawisanna tur a ni, a ti.

"Skill development hi India ram hmasawnna tur a ni a, hei vang hian
ṭhalaite'n thiamthil nei turin zirna mumal tak an neih a ngai a ni. Barak Valley huam chhungah hian skill development centre hawn a ṭul tih a hria a, Cachar, Karimganj, Hailakandi leh Haflong-a centre pakhat
ṭheuh hawng turin Union Minister for Skill Development, Rajiv Pratap Rudy hnenah ngen ka tum a ni," a ti.

NYKS inkhawmpui buatsaihah hian Cachar, Karimganj, Hailakandi leh Dima Hasao district aṭangin zirlai leh ṭhalai 1500 chuang an tel.

Ṭhalaite chu fuihin Sonowal chuan, "India ram state dang mipuiin Assam chu buaina leh hatsatna hmun a ni tia an hriat chu hun rei tak kal ta kha a ni tawh a, vawiinah chuan Assam chu hmalam hun duhawm tak nei a ni a, India ram siamṭhat kawngah state
ṭhalaite chuan tihtheih tam tak an nei a, an inhnamhnawih a ngai a ni," a ti.

Assam BJP president leh Union Minister, Sonowal chuan inkhawmpui buatsaihtu NYKS chu fakin, ṭhalaite'n an hlawkpui ngei a beisei thu a sawi.

"Sorkar laipuiin Make in India, Digital India, Skill Development, Stand-Up India leh Start-Up scheme a duan chhan chu India ram mipui zinga 65% awhtu, ṭhalaite dinhmun siamṭhatna tur a ni," tiin a sawi bawk.

Barak lui chunga lei pathum dawh belhna turin a buaipuitu, Union Ministry-ah ngen a tum thu a sawi bawk a, Silchar leh Saurashtra inkalpawhna kawngpui la peihfel loh pawh bawhzui a tum thu a sawi nghal.