Nagaland CS-in 'No Work, No Pay' hmang turin hriattir

Nagaland-ah chuan sorkar office-te hawn a nih aṭanga kar hnih hnuah pawh officer leh staff tam tak hna zawm mumal lo an la awm. Hei vang hian chief secretary Temjen Toy chuan hna thawk lo chuan hlawh pawh a la tur a ni lo tiin, sorkar hnuaia department hrang hrangah 'No Work, No Pay' policy chu khauh taka kengkawh turin a hriattir. 

Kum 2020 atana AHoD leh HoD meeting neih hmasa berah, chief secretary chuan sorkar hnathawk ṭhenkhat, inthlahdah tak takte laka a lawm loh thu sawiin, sorkar hnathawk tam zawk chuan an mawhphurhna leh sorkarin hnathawka a chhawr a ni tih theihnghilhin, anmahni duh danin an awm mai a ni, a ti. Senior officer-te hnenah an mawhphurhna hre tura chahin, entawn tlaka awm turin a ti. Entawn tlaka an awm loh chuan an hnuaia thawkte chu kal tha leh hun bi vawng dik turin an beisei thei dawn lo a ni, tiin CS chuan a sawi. Office tinah casual leave lak dan pawh khauh taka kalpui turin a chah bawk. Tuna an hnathawh dante en chuan sorkar hnathawkte chu mipui rawngbawltu tia inkoh pawh thil zahthlak a ni tih a sawi. 

January 4 khan Chief Secre­tary chuan sorkar hnathawk, office kal ṭha lo an tam avanga an lungawi loh thu a lo sawi tawh bawk. Office kallote lakah action na taka lakah a lo vau tawh a ni. Temjen Toy chuan hna tikhawtlai tam tak a awm thu sawiin, office hrang hrang pawh a lo tlawh kual tawh bawk. Office tam zawkah hnathawktu kal an la ṭhat loh avangin hna pawh a thawh mumal theih loh a ni, a ti. Sorkarin hlawh ṭha tak a pek, hnathawktute avanga hun tam tak awmze nei loa khawhral a ni chu pawi a tiin, a lungawi thlak loh tih a sawi. Hun lo kal zel turah pawh sorkar chuan a hnathawktute, an mawhphurhna hre lote lakah action a lak zel a beisei thu a sawi.