Manipur sorkarin internet pe chhuak ru-ah Airtel puh
Manipur sorkar chuan telecom provider, Airtel chu sorkarin internet pek chhuah a khap chunga state chhung hmun ṭhenkhata internet pe chhuak luiah puhin, he thila mawhphurtute hming pe turin ziakin lehkha a thawn. Internet service hi Churachandpur district chhungah a hman theih nia sawi a ni.
Home Department commissioner T. Ranjit chuan Airtel thuneitute hnenah hian lehkha thawnin insawi fiah turin a phut a, Manipur sorkar thupek zawm lo a, Airtel service chu Manipur pumpuia 'ban' a nih loh chhan tur sawi turin leh internet pek chhuah chungchanga mawhphurtute hming hriattir turin a hrilh bawk a ni. Ranjit hian Airtel thuneitute hnena a lehkha thawnah hian state sorkarin internet service a titawp chunga Airtel-in internet service a lo pe chhuak ru chu dan anga hmalak a tum thu a sawi bawk.
May thlaa tualchhung buaina a chhuah tirh aṭang khan Manipur-ah hian internet tihtawp vek a ni a, hei hi thu dik lo theh darh leh inhuat theihna lam chi theh darh tur venna atana tih a ni tih sorkar chuan a sawi. Manipur sorkar hian July 25 khan internet service chu tinungin, mobile internet erawh a la titawp chhunzawm zel a, WiFi leh Virtual Private Network (VPN) te pawh khap vek a la ni.
August 12 khan Manipur High Court chuan Manipur sorkar chu endikna leh vilna uluk tak hnuaiah internet pe chhuak leh hret hret turin a lo hriattir tawh. Sorkar hian internet service chu an mobile aṭanga social media zawng zawng delete leh VPN hmang lote tan chauh a pek chhuah tur thu a sawi a, hei bakah hian login ID leh password pawh nitin an thlak tur a ni, a ti bawk.
Imphal-ah total curfew puang
Kongba area-a volunteer panga man an nih avanga Manipur police leh mipuite inkara buaina chhuak avangin, Manipur sorkar chuan nimin khan Imphal khawpuiah total curfew a puang.
May thlaa tualchhung buaina chhuak avanga hun rei tak curfew puan a nih hnuah, September 13 aṭang khan Imphal-ah hian zing dar 5 aṭanga zan dar 9 thleng curfew thlahdul a lo ni tawh a ni.
Ningani khan police-te'n armed volunteer an mante chhuah phutin Imphal-a police station hrang hrangah Meitei hmeichhe rualte an pung khawm leh a ni. Hei vang hian sorkar chuan boruak ṭha lo zawk thleng tur venna atan nimin khan total curfew a puang zui ta a ni.