AJP-in inṭhen darhna politics dodalin kawng zawh dawn

Assam Jatiya Parishad (AJP) president, Lurinjyoti Gogoi chuan Ningani khan Assam-a inṭhen darhna politics kalpui mek dodalna tur leh, inṭhen darhna politics tuartute suih khawmna atan ni 40 awh tur 'One Assam Yatra' an neih ṭan thu an puang.

Yatra hi Brahmaputra lui kama Dhubri hmuna Netai Dhubini Ghat-ah hawn niin, a hawnna hunah hian AJP President Gogoi chuan,"Vawiina kan dinhmun hian BJP bakah party dang All India United Democratic Front angte'n inṭhen darhna politics an kalpui mek dodal hi a keng tel tlat a ni. Kan kawng zawh tur hi hengho politics chhe lutuk avanga kan khawtlang darh tawh phuar khawm lehna atan a ni," tiin a sawi. Gogoi chuan,"BJP kaihhruaina hnuaiah hian sakhua chu hmanruaah hmangin an hruaitute pawhin ṭawngkam degkhawng tak tak an chak chhuak fo a ni. Assam-ah chuan heng thil hi kan tihtawp a, kan hnam nihna leh nihphung vawng tura kan bansan a ṭul a ni," a ti bawk.

One Assam Yatra hi AJD hruaitu leh party ṭantu eng emaw zatin Assam khawthlang lam Dhubri aṭanga kal ṭanin Assam khawchhak lam Sadiya thleng an zawh ang a, Yatra hian ni 40 a awh ang.