Silchar-Badarpur kawngpui siamna tur lung phum

Union Minister for Sports and Youth Welfare, Sarbananda Sonowal chuan tun hnai khan Silchar-a Inter-State Bus Terminal (ISBT)-ah Silchar-Badarpur inkalpawhna kawngpui, double lane-a siamna tur lung a phum.

Lungphum a phum zawhah National Highways & Infrastructure Development Corporation Ltd (NHIDCL) meeting huaihawt-ah telin, Barak Valley mipuite'n kawngpui ṭha neih an phut chu sorkar laipuiin a hriatpui thu a sawi.

Barak Valley-a project lian tham ruahman turin Union Surface Transport Minister, Nitin Gadkari hmuh thuai a tum thu Sonowal chuan a sawi bawk a, Silchar-Saurashtra Mahasadak inkalpawhna bakah Malidahar-Churaibari kawngpui te pawh siamṭhat thuai a nih tur thu sawiin, kawngpui chu loneitute'n nasa takin an chhawr
ṭangkai thei dawn a ni, a ti.

Silchar MP, Susmita Dev chuan Union Minister Sonowal chu lawmthu hrilhin, Silchar-Guwahati inkalpawhna kawngpui thar siamna tur, detailed project report (DPR) an buatsaih chungchang pawh a tarlang nghal.

Hetihlai hian NHIDCL general manager, Monoj Kumar Jain chuan Silchar-Badarpur inkalpawhna kawngpui double lane-a siamna atan hian cheng vaibelchhe 70 ruahman a ni tih a sawi a, kawngpui zau zawng hi metre 10 a nih thu leh kilometre 6-a thui a nih thu a sawi bawk.

NHIDCL hi hmarchhak bial-a inkalpawhna kawngpui siam buaipuitu atan kum 2014 khan Union Ministry of Road, Transport and Highways hnuaiah din a ni a, Assam, Meghalaya leh Arunachal Pradesh-ah hnathawh an ṭan tawh bakah hmarchhak state tinah office hawn tawh a ni.

"Vision 2020 hnuaiah hmar-chhak biala kawngpui siamna tur bakah leiverh leh lei dawhna atan cheng vaibelchhe 60,000 ruahman a ni," tiin Jain chuan a sawi.