AR-in N'land media te hnena a hriattirna a hnuklet

Assam Rifles-in dan pawna hnawl tawh, helpawlte chanchin chhuah lo tura Nagaland media house te a hriattirna chu a hnuklet tih Press Council of India (PCI) thuchhuak chuan a tarlang.

PCI Chairman, Justice CK Prasad chuan Nagaland media te hnena Assam Rifle te hriattirna chungchangah Nagaland sorkar inrawlh duh lo chu mak a tih thu sawiin, PCI chuan ram buaina chungchangah media-a tarlan chungchangah media te leh security force te tan inkaihhruaina dan siam a tum thu a sawi.

Nikum November 16, National Press Day khan Assam Rifle te thuchhuah avanga an lungawi loh lantir nan Nagaland-a chanchinbu te chuan editoral ziahna hmun tiawlin chanchinbu an chhuah a ni.

PCI Chairman Prasad chuan Council ruahmanna hnuaiah Nagaland-a media pawl hrang hrang hruaitute leh Assam Rifles officer te chu January 14 khan Dimapur-ah meeting an neih thu a sawi a, press mite zalenna bakah India ram venhimna lama ngaituahin media mite leh Assam Rifle te chuan an inhriatthiam lohnaah inrem an remtih thu a sawi.

Nikum October thla khan Assam Rifle chuan Nagaland media te hnena hriattirna a tihchhuahah dan pawna hnawl tawh helpawlte chanchin chu chhuah tawh lo turin media te hi a vau a, hemi chungchang hi nikum December 11 aṭang khan PCI chuan a ngaihtuah zui nghal a ni.