Chi bing politics khelah Ajmal an puh

Assam-a rorellai Congress party, eptu party BJP leh tualṭo party Asom Gana Parishad (AGP) chuan All India United Democratic Front (AIUDF) party president, Badruddin Ajmal chu chi bing politic khelah an puh.

Ajmal hian Assam-a Hindu mite vote chu Narendra Modi prime minister a nih aṭangin a darh tih sawiin, Muslim mite dinchhuah nan an ṭanrual a ngai a ni, tiin a sawi a ni.

Party pathum te hian AIUDF hotu, Ajmal-a hi a thusawi avanga an dem thu tarlangin, Assam mipuite chu sakhaw inlakbingna hmanga ṭhendarh tumah an puh bawk.

Ajmal chuan Congress party chu Babri Masjid tihchhiat a nih chhanah a mawhphurtua a puh bakah BJP pawh sakhaw inlakbingna kalpuiah a puh bawk.

Assam-a BJP Lok Sabha MP, Bijoya Chakraborty chuan Ajmal-a thusawi chu Assam-a Hindu leh Muslim mite inkara inhuatna thlen tumna a ni, a ti.

"Sakhaw hrang inkara tharum thawhna thlen theihna a ni a, Ajmal-a hian hetiang thil hi thlentir a pawi ti lo a ni. Mahse Assam chu sakhaw hrang hrangte zalenna taka kan awmhona a ni," tiin MP Chakraborty chuan a sawi.