Sorkar laipuiin President Rule-a Arunachal dah a rawt
Union Cabinet meeting chuan Pathianni khan Congress sorkarna state, Arunachal Pradesh chu President Rule-a dah a rawt.
Politics thila Arunachal buaina chungchang hi Supreme Court constitutional bench-in a ngaihtuah mek avangin sorkar laipui rawtna hian harsatna a tihpunlun rin a ni.
Hetihlai hian Arunachal Congress party chuan President Rule-a dah rawtna chu President-in a pawmpui a nih chuan Court-a khinlet an tum thu an sawi.
Central-a Congress party hruaitu, Kapil Sibal chuan sorkar laipui thutlukna chu sawisel nghalin, ramri state boruak tihchhiat tumna a ni a, Prime Minister Modi-a kaihhruai, NDA sorkarin party dang sorkar a ngaihtheih lohna lian tak a ni, a ti.
Chief Minister Nabam Tuki pawhin sorkar laipui thutlukna chu dik a tih loh thu sawiin, President Rule-a dah rawtna chu Governor JP Rajkhowa-a thusawi zulzuia siam a ni, a ti a, hei vang hian sorkar laipui thutlukna hi awn lam nei saa siam a ni, a ti.
"Arunachal chu ramri-a awm a nih avangin ram venhim kawngah a pawimawh a, sorkar laipuiin hetianga thutlukna lian tham a siam dawn a nih chuan state sorkar a rawn hmasa tur a ni," tiin Tuki chuan a sawi a, sorkar laipui chu Arunachal-a dan leh thupek dinhmun tihchhiat tuma a puh bakah SC constitutional bench thutlukna chu nghak hmasa tura a duh thu a sawi.
Hetihlai hian Arunachal LS MP, Union Minister of State for Home, Kiren Rijiju chuan politics-a Arunachal buai chhan chu Chief Minister Tuki vang a ni, a ti.
"Chief Minister hi buai chhuah chhan, a minister emaw parliamentary secretary te ban ṭhen turin thurawn kan pe ngai lo a ni. Congress sorkar chu mipui rawngbawl turin a ṭangrual thei lo a ni," tiin Rijiju chuan a sawi.
Rijiju chuan BJP-in Arunachal-ah hian BJP sorkar din a tum loh thu a sawi bawk a, sorkar thar siam chu MLA te kuta innghat a ni, a ti.
State BJP pawhin President Rule-a Arunachal dah rawtna chu lawmawm a tih thu a tarlang.
State BJP president, Tai Tagak chuan sorkar laipui thutlukna chu hun eng emaw chen harsatna lo tawk tawh state mipuite tan thu lawmawm a ni, a ti a, state politics-a harsatna chu sorkar laipui inrawlh chhan a ni, a ti.
Sorkar laipui thutlukna chungchangah Itanagar-a Rajiv Gandhi Central University-a professor, Nani Bath chuan sorkar laipui malsawmna lo chuan eng state sorkar mah an him lo, a ti.
"State Congress party hruaitu leh worker te'n democracy kalphung palzuta hma an lakna chu state politics-a sorkar laipui inrawlh chhan a ni a, politics-a tum mumal nei lo leh thuneihna chauh chan tumte avangin mahni party chhuahsana party dang zawm duhna leh mahni party-a lungawi lohna hi a hluar chhoh zel a hlauhawm hle a ni," tiin Prof. Bath chuan a sawi.
Arunachal politics buaina hi nikuma Governor Rajkhowa-a'n kumin January 14-16-a Assembly session neih tur, December 16-a a sawn hma aṭangin a langchhuak a, rorellai Congress party worker te chuan hei hi an dodal nghal a ni.
Congress MLA lungawi lo 21, BJP MLA 11 leh independent MLA pahnihin Speaker Nabam Rebia an paihthlak theihna atana December 16-a session neih tur chu Congress worker te chuan dangin, Assembly building chu kalh a ni a, hei vang hian eptute MLA te hian community hall-ah session an nei a ni. Session-ah hian Speaker Rebia leh Chief Minister chu paihthlak an ni a, mahse Supreme Court chuan hemi chungchang hi ngaihtuahin SC constitutional bench hi he thubuai hi a rem hma loh chuan Chief Minister Tuki chu a hna chelh chhunzawm a remtih sak thung.
President Pranab Mukherjee-in sorkar laipui rawtna hi a pawm a nih chuan tun
ṭum hi President Rule-a Arunachal Pradesh dah vawi hnihna a ni ang.
Kum 1979 khan rorellai sorkara Chief Minister Tomo Riba chu amah thlawptu MLA te'n an phatsan avangin Lt. Governor, R.N. Haldipur chuan President Rule puan a lo rawt tawh a, ni 76 chhung President Rule-ah a lo awm tawh a ni.
politics-a Arunachal buaina thlen chhoh dan
December 9: Governor Rajkhowa-a'n Jan 15-a session neih tur chu December 16-ah a sawn hma
December 15: Speaker Rebia-a'n Congress MLA lungawi lo 14 te MLA nihna a hlihsak
December 16: Community Hall-a BJP MLA 11, Congress MLA lungawi lo 21 leh independent MLA 2-in session an neihah Speaker Rebia an paihthla
December 17: CM Nabam Tuki paihthlak a ni a, Congress MLA lungawi lote hruaitu, Kalikho Pul chu Chief Minister turin an thlang
December 17: Gauhati High Court chuan Governor session sawn hma chu India danpui palzutnaah a puang
December 22: Deputy Speaker, T N Thongdok chuan Dec 17-a Gauhati HC chu hnukkir turin a ngen
January 14: Supreme Court chuan Arunachal politics buaina ngaihtuahtu atan constitution bench siam a rawt
January 24: Sorkar laipuiin President Rule-a Arunachal dah a rawt