Tripura tourism atan sorkar laipuiin fund a pe

Sorkar laipui chuan a flagship programme, 'Swa-desh Darshan' kal-tlangin Tripura tourism tihchangtlunna tur fund a pe.

Fund hmang hian khual-zin mite hmunpui, Narikelkunja, Manidirghat leh Rashyabari te chu tihchangtlun an ni ang.

Union Tourism Ministry chuan Narikelkunja tihchangtlunna atan hian cheng vaibelchhe 17 a pe a, helna avang-a an chhuahsan tawh Narikelkunja hmun hi an chei ṭha leh dawn a ni.

State Tourism Minister, Ratan Bhowmik chuan he thu hi sawiin, Gomati district, Karbook subdivision huam chhung-a Dumbur dil bula awm, Narikelkunja chu nasa taka chei ṭhat an tum thu a sawi.

Mandirghat tihchangtlun nan hian Union Tourism Ministry chuan vaibelchhe 1.11 a pe bawk a, state Tourism department chuan Narikelkunja leh Mandirghat chei ṭhatna atan hian 'master plan' a siam tawh thu Bhowmik chuan a sawi.

Raishyabari tihchang-tlun nan sorkar lai-puiin vaibelchhe 1.38 a pek thu a sawi bawk.

"Dumbur dil leh a chhehvela tourism infrastructure tihchangtlun nan state sorkarin rua-hmanna nei ṭhin mah se, fund awm lo chu a harsatna a ni ṭhin a, state sorkar harsatna chu Union Tourism Ministry chuan a lak kian sak ta a ni," tiin state Tourism Minister chuan a sawi.

Bhowmik chuan Ujjayanta Palace-a 'sound & lighting show' buatsaih nan sorkar laipui chuan cheng vaibelchhe 4 a pek tur thu a sawi bawk a, state sorkar chuan a hmain hemi atan hian facility hrang hrang a lo dah tawh thu leh a ṭhat rei loh thu a sawi.

Union Ministry chuan Tripura-Bangladesh ram-ri-a Akhaura Check Post chu Punjab-a India-Pakistan ramri, Wagha border anga tihchangtlun a tum thu Bhowmik chuan a sawi a, ceremonial parade hmanna tur leh facility dang siam nan sorkar laipui chuan cheng vaibelchhe 10 a pek thu a sawi.