MCI pawmpui loh doctor lakah zirtirtu pakhat campaign huaihawt

Assam Golaghat district-a science zirtirtu pakhat chuan lung doctor (cardiologist) pakhat thiamna chu Medical Council of India (MCI)-in a pawmpui loh avangin a lakah public awareness campaign a huaihawt.

Zirtirtu chuan Golaghat Kushal Konwar Civil Hospital leh khaw laiah MCI pawmpui loh doctor chungchang thuziak a sem a, mipuite chu hetiang doctor inbumtir lo turin a ngen.

Science zirtirtu hi Mustaque Ali a ni a, dan phal loha medical practice kalpui chu pawikhawihna lian tham tak a ni tih sawiin, "RTI hmanga MCI-a zawhna ka siamah Golaghat-a cardiologist chu eng authorized body mahin a pawmpui lo tih ka hmu a, Assam Medical College aṭangin MBBS degree nei mah se postgraduate diploma in clinical cardiology a tihna chu authorized body-in a pawmpui lo a ni," a ti.

Golaghat-a damlo pakhat chu cardiologist hian pacemaker dik loa a lo vuahsak avangin tun hnai khan a thih phah thu Mustaque chuan a sawi bawk a, a chanchin chhui chiang turin Golaghat DC leh Superintendent of Police (SP) hnenah ngenna a thehluh tawh thu a sawi.

"Dan phal loha medical practice kalpui ṭhinte lakah hian DC leh SP chuan dan anga action an lak ngei ka beisei a, dan phal loha thil kalpui ṭhinte doletna chu khua leh tui zawng zawngte mawhphurhna a ni. MCI-in a thiamna a pawmpui loh chuan eng vangin kan khuaa nursing home leh hmun dangah lung natna neite a enkawl theih? Hetianga thil ti ṭhinte hi kan beihlet an ngai a ni," tiin a sawi.

Hetihlai hian Golaghat Deputy Commissioner, Anowarul Haque chuan Mustaque-a ngenna chu state sorkara Health and Family Welfare department-ah a thlen thu sawiin, doctor thiamna chungchang chu sawifiah tura a ngen thu a sawi.