Bangladesh hmasawnnain NE-ah nghawng a nei ang : CM Mukul

Meghalaya Chief Minister Mukul Sangma chuan Meghalaya leh Bangladesh inkara sumdawnna huang zauh nan inkalpawhna tihchangtlun kawngah thawhho a rawt.

Pathiannia Bangladesh khawpui, Dhaka-a 'Bangladesh Investment & Policy Summit 2016' hawnna inkhawma thu a sawiah Chief Minister Mukul chuan he thu hi a sawi a, Bangladesh economy ṭhang chho mek chuan hmarchhak state te a nghawng tur thu a sawi.

Kum sarih kal ta chhungin Bangladesh economy 6%-in a ṭhang tih CNN-in a report chu Mukul chuan tarlangin, Bangladesh ṭhanna chu ram ṭhanglaite economy hmasawn chak lamah a pahnihna a ni, a ti a, hei hian hmarchhak bial tan beiseina thar a siam dawn a ni, a ti.

Mukul chuan Meghalaya leh Bangladesh-in ramri kilometre 443-a thui an inṭawm tih sawiin, ram pahnih chu Brahmaputra leh lui dangin an thlunzawm avangin hemi kaltlang hian bungraw thawn luhna leh thawn chhuahna atan inkalpawhna siam a rawt a, bungraw phurh a khaihlak loh nan land custom station pawh hawn belh a rawt nghal.

Sumdawnnaa India leh Bangladesh thawhdunna huang zauhna tura hmarchhak state dang Chief Minister te hmalakna chu tarlangin, hemi atana hmalakna ṭhahnem tak awm mek chu lawmawm a tih thu a sawi.