Manipur : Churachandpur-ah temporary prison siam: Thla 5 hnuah mobile internet service tihnun a ni ta

Manipur sorkar chuan kar liam ta Zirtawpni khan thupek tichhuakin, Churachandpur district-a Ganpimul-a Border Security Force (BSF) Subsidiary Training Center (STC) huam chhungah tan in lailawk tana hman tur, temporary prison-ah a siam.

Governor Anuisuiya Uikey chuan hemi chungchanga thupek hi tichhuakin, dan leh thupek dinhmun ngaihtuahin temporary prison pawh hi a function nghal tih a sawi. He tan in lailawk siamah hian SDO/Churachandpur leh Churachandpur police station-a officer-in-charge chu an duty neih sa bakah, jail superintendent leh jailor hna an chelh tel ang.

Hetih lai hian tribal pawl, Indigenous Tribal Leaders Forum (ITLF) chuan state chhung buaina chhuak kaihhnawiha Kuki-Zo man tawk, Imphal tan in tang mekte chu hmun danga sawn turin an ngen a, Churanchandpur-a temporary prison a siam chu Kuki-Zo tang mekte sawn chhuahna tur a nih ngei an beisei thu an sawi.

Mobile internet service tinung ta

Manipur-a tualchhung buaina chhuah avanga state puma mobile internet service tihtawp chu thla nga hnu, Inrinni aṭang khan tihnun a ni leh ta.

Chief minister N Biren Singh chuan press conference a neihah, internet service tihnun a nih thu hi a sawi a ni. CM chuan, "May 3-a buaina a chhuah hnuah fimkhur thilah sorkar chuan state pumah internet hi a titawp a, mahse, Inrinni aṭangin mipuite hman theih turin tihnun a leh ni ta a ni," a ti. Hemi rual hian sorkarin internet service a khap laiin Airtel chuan Churachandpur district-ah a lo pe chhuak ru nia sawiin, Airtel hnuaia thawk mi pahnih pawh suspend an ni tawh niin a sawi bawk.

CM chuan internet service tihnun a nih leh tak avangin thu dik tawk lo thehdarhte a awm thei tih a sawi a, mipuite chu fimkhur turin a chah. Sorkar chuan ngun takin a vil zui reng dawn tih a sawi.