Hornbill festival atan Nagaland inbuatsaih

Nagaland-in festival an neih pui ber leh hlut hlawh ber tihngam, December chawlhkar hmasa bera neih ṭhin, Hornbill festival inbuatsaihna chu kalpui ṭan a ni.

Tourism and higher education minister, Temjen Imna Along chuan Hornbill festival atana inbuatsaihna an kalpui chhoh ṭan tawh thu leh, kum dang zawng aia ropui leh dangdaia buatsaih an tum thu a sawi.

Hotel Japfu-a consultative meeting neih ṭum hnihnaah Along hian thu sawiin, ṭum dang zawng aia festival hmangtute'n nuam an tih tur leh ṭhaa huaihawt a duh thu a sawi a,"Ni 10 chhung Hornbill festival kan neih turah hian Nagaland hnam leh nunphung lantir a, khawvel hmun tin aṭanga khualzin hip thei turin engkim kan kalpui a ṭul a, sawmna pawh khawvel hmun danga mi eng emaw zat hnenah thawn chhuah tawh a ni," a ti. Manipur buaina avanga festival chhimtu an tlem hlauhthawnna awm deuh mah se, boruakin ṭhat lam a pan zel beisei chungin, Nagaland leh Manipur inkar boruak ṭhatna pawhin khualzinte rirlu a hneh a, tam tak an lo kal theih ngei a beisei thu a sawi bawk.

Meeting-ah hian Along hian Nagaland-in khawvel hmuha hmasawnna a neih pholan a ṭul thu leh, helna hmun anga an hriat ṭhin chu Hornbill festival kaltlanga a nawmna lam an hmuh len zawk tawh thu a sawi a, festival hlawhtlinna chu hruaitute ṭhat leh ṭhat lohah a innghah thu a sawi bawk a ni. Sorkar hian department hrang hrang leh hnam hrang hrangte nena thawhhona ṭha siam tura hma a lak a ṭul a ni, a ti.

Aklong hian Hornbill festival atana an inbuatsaihna zingah festival chhung hian IDAN siam, ṭawih thei bag chu hman uar a duh thu a sawi. Investment and Development Authority of Nagaland (IDAN) hi Nagaland sorkar hnuaia entrepreneur te chawikanna tura hma la tura din a ni a, ṭawih thei bag an siam hi September 29 hian Kohima-a The Heritage-a Bloom Bazar hawn a nih hunah lei theihin an zuar dawn a ni.