Assam : Mahila Congress-in CM lakah FIR theh lut

Assam Pradesh Mahila Congress chuan Inrinni liam ta khan an state chief minister, Himanta Biswa Sarma lakah FIR an theh lut.

Mahila Congress hian CM Sarma chu kar liam ta Thawhlehnia assembly inthlan neihna tur, Madhya Pradesh-a rally neihnaa thu a sawiah sakhaw behchhanin inhuatna chawk chhuak thei zawnga thu sawiah an puh.

Dispur police station-a state president Mira Borthakur Goswami kaihhruai FIR an theh luhah hian, "Assam chief minister chuan Madhya Pradesh chief minister hlui leh Indian National Congress-a politician pawimawh, Kamal Nath chu Lord Hanuman-a'n Lanka a hal anga 10,Janpath hal turin a ti a ni," an ti. He a thusawi hi Hindu sakhaw zuitute fuihphawrh a, sakhua leh hnam inhuatna chawh thawh tuma sawi a ni, tiin CM Sarma chu an puh. 10,Japanth hi Congress party president hlui leh Parliament member ni mek, Sonia Gandhi chenna hmun a ni.

Congress senior leader leh Assam legislative assembly-a leader of opposition ni lai, Debabrata Saiki pawhin CM Sarma lakah hian FIR a theh lut ve bawk. Assam Pradesh Congress Committee president (APCC) Bhupen Kumar Borah chuan Madhya Pradesh Congress Committee president, Kamal Nath hnenah an state-ah Sarma laka FIR theh lut ve turin a ngen bawk.