Manipur-ah central armed force mi 400 tirh luh belh

Border Security Force (BSF) leh Central Reserve Police Force (CRPF) sipai 400 chu tualchhung buaina chhuak avanga hun rei tak harsatna tawk tawh, Manipur-ah thawn luh belh an ni. Manipur-a sipai thawn luh belh hi state sorkarin Churachandpur-a BSF hmun, tan in lailawk atan a buatsaih avanga sipai indaihna lohna vang nia hriat a ni.

Manipur chief minister N Biren Singh chuan Pathianni khan Border Roads Organisation (BRO) hotute nena meeting neiin, Manipur-a India leh Myanmar inrina km 70 chu fencing siam belh a duh thu a sawi. Singh chuan fencing siamna tur atan ruahmanna a neih tawhte sawiin,"Raltlan leh a ruka lo lut ṭhin bakah, ṭhenawm Myanmar ram aṭanga damdawi smuggling kalpui ṭhinte thlirin, kan ramri venhim hi kan tihmakmawh a ni," a ti. Sorkar laipui pawhin BRO-te chu Indo-Myanmar border hungna tur order a pek tawh thu sawiin,"Myanmar aṭanga lo lut rute dan chah hi kan ngaipawimawh hmasa tur a ni. Chumi ti tur chuan ramri hung vat hi a ṭul," a ti bawk. Biren Singh hian state sorkar chuan sorkar laipui hnenah India leh Myanmar inkara Free Movement Regime (FMR) titawp tura a ngen tawh thu a sawi. Kum 2018-a ziah, FMR inremnaah hian, khawi lam zawk ram pawh a ramri hrula chengte chu a lehlam ram chhung km 16 thleng an luh phalsak an ni.

Sorkar laipui chuan Manipur tualchhung buaina avanga tlanchhia, Internally Displaced People (IDP), Mizorama sahimna zawnga awm mekte chu a sum faia chhawmdawlna a pek theih loh thu a sawi. Ministry of Home Affairs-in Mizoram Home Department hnenah Manipur raltlante chu ei tur leh damdawi ang zawng chauha ṭanpuina a pek theih thu a hrilh tih Mizoram Home Commissioner, H. Lalengmawia chuan a tarlang. September 23 thleng khan Mizorama Manipur raltlan awm hi mi 11,973 an tling tawh.

Lalengmawia chuan,"Home Ministry-a kan dilnaah chuan thla ruk daih tur buhfai, badam leh chana lam chi, alu, tel, damdawi, inenkawlna hmanrua leh a dangte kan tarlang a ni," a ti. Ṭawngkaa chhanna an dawn hi May 23-a chief minister Zoramthanga'n union home Mmnister Amit Shah hnena dilna a thlen chhanna a nih thu a sawi bawk. CM Zoramthanga hian Manipur raltlante tan hian central sorkar hnenah Rs. vbc 10 a lo dil tawh a ni.