India state zinga thil man san chakna ber Meghalaya

Meghalaya chu India rama Consumer Price Index (PCI) sanna nasa ber niin, ram sum leh pai dinhmun ṭha loin a hrin, thil man sang chak berna a nih thu sorkar laipui data tihchhuahah an tarlang. Meghalaya CPI hi point 19 zetin a san belh tawh.

Official statement-a tarlan danin Meghalaya-a thil man san chakna chhan nia lang chu, nitin mamawh; buhfai, chana, bawng sa, badam tel, purunsen, leh hmarcha bakah bus fare pung zel vang a ni.

CPI punna, 8.38 point hi official thuchhuahah chuan a tlangpuiin ei tur vang a nih thu tarlan a ni. Heng buhfai, maida, atta, chana, bawnghnute, kel, chini, hmarcha, aieng, purunvar, purunsen leh spice chi hrang hrang vang a ni an ti. Ram pum huapa lakin August thla chhung khan loneitu leh thinglang lama hnathawk ṭhinte tan thil leina man a ziaawm viau a, a hma thla nena khaikhinin 7.12% leh 7.37% te ni mah se, Meghalaya-ah erawh an dinhmun hi a ṭha lo hle thung. State dangin an lai tat a nih avang leh rel lut a tlem avangin Meghalaya-ah hian nitin mamawh lak luhna kawngah harsatna lian tak an nei a, hei hian an dinhmun hi a tichhe zual thei a ni.

Hetih lai hian political party hrang hrangte chuan an state-a thil man sang chak tih chu an pawm loh thu an sawi a, thil man sang chak a awm chuan tihluihnaa pawisa indil chhuah leh dan phal loh hmanrua aṭanga tax lakte vang a nih thu an sawi.