Tripura police-te'n ruihhlo tawlhrute zawng dawn

Rabindra Satabarshiki Bhavan-a NSS Day lawmna puala seminar buatsaih "Nasha mukt Tripura" hawnnaah Tripura chief minister Dr. Manik Saha chuan thu sawiin, ruihhlo tawlh rua sumdawng hotute chu ruihhlo sem darh leh chet vel dana ngaihtuahna sengtu berte an ni tiin, an laka rang tak leh na taka hma lak a ṭul tih a sawi.

CM Saha chuan,"An kal kawng kan hre tawh a, Mizoram aṭanga Tripura-a rawn lut an ni. A bul tumtu tak tak erawh Myanmar lamah a awm thung. Kan thu hriat dan aṭangin kan police-te hian uluk takin an veh mek a, ruihhlo tawlh rutu mi ṭhenkhat an man tawh a, a bul tumte man turin an thawk chhunzawm reng bawk," a ti.

CM Saha chuan khawtlang aṭanga ruihhlo um bo turin mipuite chu an ṭanrual a ṭul thu a sawi a,"Ruihhlo leh a kaihhhnawih thil chi hrang hrang, kan rama lak luhte hi kan ram ṭhalaite tichhia a, kan ram tlukna tur atana hmalakna a ni. Ram leh khawtlamg hi he sual lakah hian kan ṭan tlat a, kan theihtawpa kan do let hi a ṭul a ni, misualte hi kan hlawhtlintir thiang lo," tiin a sawi. Nasha Mukt Tripura campaign chungchang a sawi zaunaah ruihhlo laka an fate chhan tura nu leh pate hnen aṭanga ngenna nasa tak an dawn ṭhin thu a sawi a, sorkar pawhin theihtawpa state chhunga ruihhlo lut tur a ven thu sawiin, mi tute emaw ruihhlo tawlh rute nena inthlunzawm an awm tlat thu a sawi.