Hmarchhak MP-te'n NH-6 ngaihven turin Union Minister ngen

Hmarchhak state pali - Assam, Meghalaya, Mizoram leh Tripura-a Parliament member pangate chuan union minister of road transport and highways, Nitin Gadkari hnenah kawngpui pawimawh, National Highway 6 (NH-6) chhe lutuk chu siamṭha tura a rang lama ngaihven turin ngenna an theh lut.

Union Minister hnena lehkha an thawnah, hmarchhak MP-te chuan NH-6 chu hmarchhak state-te inkalpawhna kawngpui pawimawh a ni tih sawiin, kawngpui hi a chhe tawh hle a, hei hian hmarchhak bial mipuite tan pawh harsatna thlenin, an himna dinhmun thlengin a hlauhthawnawm pha tawh niin an sawi.

MP rualte chuan nikum chhungin NH-6 chu siam ṭhat a ni lo tih an sawi a, hetianga kawngpui pawimawh tak ngaihthah leh a chhiat avang hian zinkawng atana hun hman thlengin a nghawng a, accident thlen theihna pawh a sang tawh a, nitin mamawh phurtute tan pawh harsatna a siam a ni, an ti.

Union Minister hnena ngenna thlentute hi Meghalaya MP Vincent Pala, Assam MP pahnih Rajdeep Roy leh Haren Singh, Tripura MP Rebati Tripura leh Mizoram MP C. Lalrosanga te an ni.

KSU-in nawrh an huaihawt

Meghalaya-a Khasi Students’ Union East Jaintia Hills (KSU-EJH) chuan Thawhṭanni khan NH-6 chhe lutuk avanga lungawi lohna lantirin Khliehriat-ah nawrh an huaihawt.

Meghalaya-a pawl hrang hrang chuan NH-6 siam ṭhat phut hian thuneitu lam pawh an lo nawr fo tawh a, mahse, thuneitu lamin an thil phut chu an ngaihven lo niin an sawi.

KSU-EJH hian an state leh hmarchhak state tana kawngpui pawimawh, NH-6 in ngaihsak a hlawh loh avanga lungawi lohna lantirin, kawngpui laiah an mu a, kawng chhe khuar laiah buhte an phun bawk. Nawrh huaihawt avang hian Thawhṭanni khan NH-6-a motor tlan pawh an dang vek a ni.

KSU hian national highway siam ṭha tura sorkar leh National Highways Authority of India (NHAI) phuta nawrh an huaihawt ṭum hnihna a ni tawh.