Khasi hnam chanchin zir chianna atan Rs nuai 50 ruahman

Khasi Hills Autonomous District Council (KHADC) chief executive member, Pyniaid Sing Syiem chuan hmun 20-a Khasi hnam tradition, culture, custom leh practice-te zir chianna turin council chuan Rs nuai 50 a ruahman tih a sawi.

Kashni hnam chanchin zir chianna nei tur hian Carness Sohshang kaihhruai, Education department hnuaia Research and Development Committee chu hriattir an ni.

Syiem chuan sum ruahman aṭanga Rs nuai 20 chu major research tihna atan dah a ni a, Rs nuai 15 chu minor research leh, lehkhabu leh thildang mamawh tan Rs nuai 5 ṭheuh dah a ni tih a tarlang. Committe member-te TA/DA leh sitting allowance atan Rs nuai 2 dah a ni bawk. Khasi hnam zir chiangtute hi March 31, 2024-ah zo hman tura tih an ni.

Khasi hnam chanchin zir chianna, research paper leh lehkhabu awm ṭha lo chu research scholar tam takin harsatna an tawh phah a ni tiin Syiem chuan a sawi. Hei vang hian state chhunga hmun thlan bik 20-ah Khasi hnam hrang hrangte ṭawng hrang leh nunphung, inrelbawlna, khawtlang nun, ram neih dan, thil zawrh dan, music instrument an hman, an pipute hmun, thiam thil, ei leh in, damdawi leh thil dangte zir chian a ni dawn a ni.