Union Minister-in AP-a Tezu Airport chei ṭhat a hawng

Union civil aviation minister Jyotiraditya Scindia chuan Arunachal Pradesh-a Lohit district-a Tezu airport chei ṭhat chu Pathianni khan a hawng. Airport-ah hian terminal building thar sak a ni a, runway pawh zauh a ni bawk.

Union Minister chuan prime minister Narendra Modi inpekna leh tumruhna avangin hmasawnna nasa tak a thleng thei niin a sawi. Hmarchhak biala airport pakua chauh awm ṭhin chu tunah chuan 17-ah a pung tawh a ni, a ti.

Airport Authority of India (AAI) official-te chuan Tezu Airport terminal hian peak hour-ah khualzin 300 vel a dawngsawng thei dawn a, ATR aircrat pawh a rualin pahnih an ṭum thei tawh dawn niin an sawi. Runway hi meter 1,500-a thuiin siam a ni. Tezu Airport hi kum 2018-ah Ministry of Civil Aviation-a Regional Connectivity Scheme (RCS) hnuaiah hman ṭan a ni a, Dibrugarh, Imphal leh Guwahati-te thlunzawmin Alliance Air leh Flybig airline an service a ni.