BJP-in Assam CM candidate atan Sonowal a ruat

Kumin Assam Assembly inthlan neih tur atan Bharatiya Janata Party (BJP) chuan Chief Ministerial candidate-ah Union Sports Minister Sarbananda Sonowal a ruat.

BJP general secretary JP Nadda chuan he thu hi sawiin, Prime Minister Narendra Modi leh party national president, Amit Shah hoa BJP parliamentary board meeting chuan Assam BJP president hna chelh lai, Union Minister Sonowal chu Chief Ministerial candidate atan a ruat thu a sawi.

"Assam mipui chuan Sarbananda Sonowal chu India rampuma an aiawhtuah an ngai a, hei vang hian BJP parliamentary board pawhin Assam Assembly inthlan chu a kaihhruaina hnuaia hmachhawn a duh a ni. BJP chuan Sonowal kaihhruaina hnuaiah sorkar a siam ngei ang," tiin Nadda chuan a sawi.

State party hruaitute ngai pawimawh lo a, state Assembly inthlan a hmachhawn avangin BJP chu nikum khan Bihar Assembly leh Delhi Assembly inthlanah a che chhe hle a, Sonowal-a Chief Ministerial candidate-a ruatna hi state Assembly inthlan an hmachhawn dan kalphung thlak danglamna lian tak a ni. Delhi Assembly inthlan khan Kiran Bedi chu inthlan dawn hnaiha Chief Ministerial candidate-a ruatin, Prime Minister Narendra Modi hmingṭhatna hmangin vote an zawng thung a ni.

Nadda chuan state-a inthlan lo awm zel turah Chief Minister candidate-a state-a party hruaitute dah an ni zel ang em tia zawhna chhangin, hemi chungchang hi an la sawi zau loh thu a sawi a, an la ngaihtuah ṭhat tur thu a sawi.

Kum 53 mi, Union Minister Sonowal hian tunah Union Sports and Youth Affairs Minister hna chelh mekin, kum 2011-a BJP a zawm hmain, All Assam Students’ Union president hna leh Asom Gana Parishad (AGP)-ah party hruaitu hna a lo chelh tawh a ni.