Congress-in BJP leh AIUDF a hneh ang: Gogoi

Assam Chief Minister Tarun Gogoi chuan Bharatiya Janata Party (BJP) leh All India United Democratic Front (AIUDF) chu sakhaw inthliarna politics khel a, mipui ṭhendarh tumah a puh a, state Assembly inthlan neih turah a kaihhruai, Congress party chuan a hneh ngei tur thu a sawi.

Gogoi chuan sakhaw inthliar hranna chu Assam
aṭanga umbo a nih theih nan Congress party chuan political party hrang hrang, zirlai pawlte leh non-political group te a thawhpui ṭhin thu a sawi.

"BJP leh AIUDF chu an kalphung a inang a, sakhaw behchhan nei ve ve an ni a, Assam-a thui taka an kal kan remti tur a ni lo," tiin Gogoi chuan a sawi.

Hetihlai hian Gogoi chuan Padma chawimawina hrang hrang dawng tura Assam mi an rawt chhuahte sorkar laipuiin chawimawina dawng tura a thlan loh avanga a lungawi loh thu a sawi.

Gogoi chuan Assam mi, an rawt chhuahte sorkar laipuiin a hnawl chu inzahlohna anga a ngaih thu sawiin, state sorkar leh sorkar laipui thawhhona
ṭha thlentir tum nen a inpersan hle a ti.

"Padma chawimawina hrang hrang dawng tur thlan-chhuah chu sorkar laipui mawh-phurna ni mah se hetianga midang ngaihthahna hi a la thleng ngai lo a, anmah-nia an thlang thei a nih chuan eng vangin nge rawtna siam tura state zawng zawngte min hriattir," a ti.

"Tu rawtna hmangin Padma chawimawina hi semchhuah a nih? BJP hruaitu pali kumina Padma chawimawina dawngte rawtna angin em ni chawimawina dawngtute chu thlan an nih?" tiin a sawi bawk.

Kumin hian Assam mi pali- Dhirendra Nath Bezbo-ruah, Prahlad Chandra Tasa, Kameshwar Brahma leh Ajoy Kumar Dutta (social work) te chuan Padma chawimawina an dawng a ni.

Gogoi chuan kumina Padma chawimawina dawng tur hian an awmna political party thliar loin Assam mi 28 a rawt chhuah thu a sawi a, "Kan dikna chanvo chhuhsak kan nih chuan kan beilet zel ang," a ti.