Rajkhowa-a'n President Rule puan a rawt chhan tarlang

Arunachal Pradesh Governor, Jyoti Prasad Rajkhowa chuan Ningani khan Arunachal-a President Rule puan a rawt chhan chu ziakin Supreme Court-ah a thehlut.

Justice Jagdish Singh Khehar, Justice Dipak Misra, Justice Madan B. Lokur, Justice Pinaki Chandra Ghosh leh Justice N.V. Ramana te awmna Surpreme Court constitution bench chuan President Rule puan a rawt chhan thehlut tura an hriattir angin, Governor Rajkhowa hian a report hi a thehlut a ni.

Arunachal-a President Rule a rawt chhanah hian Governor Rajkhowa chuan state sorkar inrelbawlna mumal lote, dan leh thupek dinhmun chhe lutuk te leh December 16-a Assembly session a koh dodaltute'n Assembly building an kalh vang te a ni, a ti a, rorellai Congress sorkarin a party MLA lungawilote nawr nan NSCN (Khaplang) hel a hman vangte a ni, tiin a tarlang bawk.

Chief Minister hlui Nabam Tuki leh Assembly Speaker hlui Nabam Rebia te kaihhruaina hnuaiah Congress party worker te'n a laka lungawi lohna an lantir ṭuma Raj Bhavan kawtah lawi (mithun) an talh avangin Governor Rajkhowa chuan President Rule puan rawtna hmasa ber a awm a ni, a ti.

Hetihlai hian sorkar laipuiin President Rule-a Arunachal a dahna chu Chief Minister hlui Tuki chuan Ningani khan Supreme Court-ah petition thar thehlutin a khinglet leh.

Arunachal Congress Legislature party, Chief Whip Rajesh Tacho-a'n sorkar laipui khinletna petition a lo thehluh tawh nen Supreme Court chuan Tuki-a petition thar thehluh hi Thawhṭanni hian a ngaihtuah leh ang.

Supreme Court consti-tution bench-in President Rule khinletna petition Ningania a ngaihtuah ṭum-in sorkar laipui Attorney General, Mukul Rohatgi chuan Congress Chief Whip Rajesh Tacho-a petition thehluh chu President-in President Rule-a Arunachal a dahna khinletna a ni lo tiin petition chu hnukkir turin Court a ngen a, hei vang hian a tharin Tuki hian petition a thehlut leh a ni.

Arunachal Assembly member 60 awmnaah Congress chuan member 47 neiin sorkar a siam a, Chief Minister Tuki-a laka MLA 21 an hel hnuah state politics buaina hi a inṭan a ni. BJP MLA 11 te chuan Congress MLA lungawilo 21 te hi tawhpuiin, Speaker paihthlakna motion an thehlut a, hei vang hian nikum December 9 khan Governor Rajkhowa chuan kumin January 14-a Assembly session neih tur chu December 16-ah a sawn hma phah a ni.

Governor-in Assembly session a koh hi rorellai Congress sorkar chuan a dodal nghal a, mahse BJP MLA leh Congress MLA lungawi lote chuan December 16 khan Itana-gar-a community hall-ah Deputy Speaker kaihhruai-na hnuaiah session neiin, Speaker Rebia-a'n Cong-ress MLA lungawi lote zinga MLA 14 te nihna a lo hlihsak tawh chu a sut sak a, Speaker Rebia hi an paihthla a zui nghal. December 17 khan community hall-ah session neih lehin Chief Minister pawh paihthlak a ni a, Congress MLA lungawi lote zinga mi, Kalikho Pul chu Chief Minister atan thlan a ni.