NE-a khawpui zingah Guwahati chauh thlang

Sorkar laipuiin Smart City Mission hnuaia India rama khawpui a tihchangtlun tur 20 a thlanchhuah zingah hmarchhak state aṭangin Guwahati chauh thlan a ni.

Union Urban Development Minister, M Venkaiah Naidu chuan Ningani khan smart city list hi a puang a, Smart City Challenge intihsiaknaa a
tiṭha zual 20 thlanchhuah a nih thu leh khawpui 20 an thlan dan chu langtlang leh felfai taka kalpui a ni, a ti. Smart City Mission kalpuina atana khawpui thlanchhuahte hian financial year kal lai aṭang hian khawpui tihchangtlunna tur sum an dawng ṭan nghal ang.

Naidu chuan Smart City Challenge intihsiaknaah mi vaibelchhe 1.52 vel an tel thu sawiin, a thawh khatnaah khaw-pui 97 thlanchhuah a ni, a ti a, Smart City Mission-a mi ṭha-hnem tak inhnamhnawih chu thil ṭha chhuah chhan a ni, a ti.

Union Minister Naidu chuan khawpui thlanchhuah 20 te kum nga chhungin tihchangtlunna atan cheng vaibelchhe 50,802 ruahman a ni, a ti a, public-private-partnership (PPP) mode hmanga project kalpui a nih tur thu a sawi.

Hmarchhak state aṭanga Smart City Mission kalpuina tura thlanchhuah zinga tel awm chhun, Guwahati khawpui hi a pumpuiah 17-na a ni a, hmar-chhak state-a pahnihna chu Arunachal Pradesh-a Pasighat a ni a, a pumpuiah a 39-na a ni.