Arunachal sorkar inrelbawlna Governor kutah dah Zirlai pawlin President Rule an dodal

January 26 zan aṭanga President Rule puan a nih tak avangin Arunachal Pradesh sorkar inrelbawlna chu Governor JP Rajkhowa kutah dah a ni.

Governor chuan senior officer te chu mipuite tan eiruk awm lohna leh inrelbawlna ṭha kalpui turin a ngen nghal.

Governor Rajkhowa chuan Nilaini tlai khan state sorkar senior officer te chu Raj Bhavan-ah meeting a neihpui a, dan leh thupek khauh taka lekkawh tur leh state chhunga venhimna lam khauh taka kalpui turin a hriattir a, mipuite himna atana dan siam chu a taka zawm turin a ngen.

Rajkhowa chuan sorkar hna-thawh hrang hrangah langtlang taka inrelbawlna kalpui tura department leh office tinte hriattir turin Chief Secretary a hrilh bawk.

"Arunachal mipuiin an beisei angin President Rule hnuaiah hian eiruk awm lohna leh sorkar inrelbawlna ṭha a awm tur a ni," a ti.

Governor Rajkhowa chuan Chief Minister, Minister leh Parliamentary Secretary te office chu khar nghal turin thuchhuah a siam nghal a, an office-a sorkar lehkha pawimawhte chu him taka vawn tur a ni, a ti.

Chief Minister, Minister leh Parliamentary Secretary te ban ruala bang nghal tur, an hnuaia thawk- Adviser, OSD leh Special Officer te pawh ban nghal vek an ni bawk.

Governor chuan bandh huai-hawt emaw kawngpui danchah leh dan phal loha sorkar dodalna nawrh huaihawt a khap nghal a, a ṭul chuan Code of Criminal Procedure (CrPC ) Section 144 tlawh-chhana curfew puan a rawt nghal.

"Thliar bik awm loin khauh taka dan lekkawh tur a ni a, dan bawhchhiate chu dan angin thubuai siamsak tur an ni a, a rang thei ang berin court-ah an chung-chang ngaihtuah tur a ni," a ti.

Governor chuan senior officer te chu langtlang taka inrelbawlna kalpui turin a hrilh bawk.

Arunachal Governor Raj-khowa advisor atan hian Delhi Police Commissioner, Y S Dadwal leh G S Patnaik (IAS Rtd) te chu ruat an ni.

Hetihlai hian Arunachal Pradesh Students’ Union (AAPSU) chuan sorkar laipuiin President Rule-a an state a dah chu thuthlukna felhlel tak a ni, tiin President Rule chu sut a nih loh chuan a dodalna atana democracy kalphung zulzuia movement lian tham tak kalpuiah sorkar laipui a vau.

"Thil pawh finfiah hmasa loa sorkar laipui thutlukna siam hi a felhlel hle a, kan pawm thei lo a ni. Hei vang hian theihtawpin kan dodal zel ang," tiin AAPSU president Kamta Lapung chuan a sawi.

Lapung chuan Arunachal-ah dan leh thupek dinhmun a tlak chhiat loh thu sawiin, sorkar laka lungawi loh avanga nawrh huaihawt leh kawngzawh te chu dan leh thupek tlakchhiatna a ni lo, a ti.

President Rule puan chhanah AAPSU chuan Arunachal MP, Union Minister of State for Home Affairs, Kiren Rijiju chu a mawhphurtua puhin, mipui thlantlin sorkar paihthlatu a ni, an ti.

"Arunachal-a BJP sorkar a din theih nan he thil thleng hi Kiren Rijiju ruahman a ni," tiin Lapung chuan a sawi.

Arunachal Bharatiya Janata Party (BJP) chuan President Rule puan a ngaih chhanah rorellai Congress sorkar chu puhin, All India Congress Committe (AICC) chuan party chhung buaina chu a chingfel thuai tur a ni, a ti.