SC-in insawifiah turin Sorkar laipui a hriattir

Supreme Court chuan Arunachal Pradesh-a President Rule puan a nih chhan sawifiah turin sorkar laipui a hriattir.

President Rule-a Arunachal a dah avang hian rorellai Congress party chuan sorkar laipui chu Supreme Court-ah a khinglet a, Constitution Bench chuan Nilaini khan thubuai hi ngaihtuahin, sorkar laipui bakah Arunachal Governor Jyoti Prasad Rajkhowa pawh President Rule puan chhan hi sawifiah turin a hriattir bawk.

Supreme Court Consti-tution Bench-ah hian Justice Jagdish Singh Khehar, Justice Dipak Misra, Justice Madan B Lokur, Justice Pinaki Chandra Ghosh leh Justice NV Ramana te an awm.

Supreme Court chuan thubuai thehluttu, Aruna-chal Pradesh Congress chief whip, Rajesh Tacho chu a thubuai thehluh siam- ṭha tura hriattir nghalin, sorkar laipui thutluk-na a khinletnaah hian President-in President Rule a puan chu khinglet tel turin a hriattir. Governor Rajkhowa-a'n Arunachal-a President Rule puan a rawtna sorkar laipuia a thlen hun tarlang turin a hriattir bawk.

Senior counsel, Fali Nariman chuan Aruna-chal politics buaina chung-chang nikum February 22-a court-a hearing neih a nih aṭangin Arunachal Pradesh chu President Rule-a dah a nih tawh thu a sawi a, state relbawlnaa Governor puih turin advisor pahnih ruat a ni, a ti.

Governor Rajkhowa-a'n President Rule puan a rawt hun a hriat duh thu sawiin, Nariman chuan Governor Rajkhowa-a counsel, Harish Salve-a'n January 14-a hearing neih ṭumin thil duhawm lo a thlen loh tur thu a lo sawi tawh a ni, a ti.

Senior counsel, Kapil Sibal pawhin Governor-in President Rule-a Arunachal dah a rawt hun leh ni chu hriat chian a duh thu sawiin, Governor rawtna leh President Rule puan a rawtna atana a finfiahna hmante pawh hmuh a duh thu a sawi bawk.

Attorney General, Mukul Rohatgi chuan Governor report chu confidential a ni tih sawiin, sorkar laipui thutlukna khinglettu (petitioner) te hmuh theih a nih loh thu a sawi a, mahse Constitution Bench hnenah chuan pek theih a ni, a ti.

Rohatgi chuan Union Cabinet rawtna chu Court-a khinlet chi a nih loh thu sawiin, "Official thuchhuak a awm a nih loh chuan Union Cabinet rawtna chu khinlet chi a ni lo," a ti.

Mahse SC Con-stitution Bench chuan Congress chief whip, Rajesh Tacho-a'n a khinlet chu eng pawh ni se, chhanglet turin Attorney General, Rohatgi chu a hriattir.

Justice Dipak Misra chuan Rohatgi chu Court hriattirna chu pawm tura hriattirin, "Tacho-a'n petition a thehluh chu eng thil pawh ni se hriattirna kan tihchhuah tawh avangin i chhanlet a ngai a ni," a ti.