Manipur-a pawisawilo thihna sorkar laipuiin chhui dawn

Manipur police commando pakhatin kum 2009-a helte beihna lema pawisawilo a kahhlum thu a sawi chu sorkar laipui chuan a chhui chian tur thu Nilaini khan a sawi.

Union Home Minister Rajnath Singh chuan he thu hi Nilaini khan Kerala khawpui, Thiruvananthapuram-ah a sawi a, "Hemi chungchang hi ka lo hre chiang phawt ang a, chuan ka sawi belh thei ang a...kan chhui chiang thei dawn a ni," tiin a sawi.

Manipur police head constable, Thou-naojam Herojit Singh chuan kum 2009, July 23 khan People’s Liberation Army (PLA) hela rinhlelh, Chungkham Sanjit Meitei (22) chu Imphal bazar bulah a kahhlum thu a sawi a, an hotuten kap tura thu a pek avanga kap a nih thu leh a kah lai hian Chungkham Sanjit hian silai a ken loh thu a sawi bawk.

Union Minister of State for Home, Kiren Rijiju chuan police constable, Herojit Singh-a thusawi chu sorkar laipui chuan a hriatpui thu sawiin, bawhzui a tum thu a lo sawi tawh bawk.

"Herojit Singh-a inpuanna chanchinthara ka hmuh chuan ka rilru a tibuai hle a, hei hi thu tlinga ngaiin bawhzui kan tum a ni," tiin Rijiju chuan a sawi.

Manipur-a Congress hruaitu, RPN Singh chuan police commando te'n he thilthleng chungchanga ngawih an chuh tlat chu a hriat thiam loh thu sawiin, Herojit Singh-a inpuanna chu a dik a nih chuan chhui chian ngei a phut thu a sawi.

Chanchinbu mi pakhatin local televi-sion-a a kawmnaah thilthleng chu eng vanga puang chhuak nghal lo nge a nih tia a zawh chu Herojit Singh chuan chhangin a hlauhthawn avanga puang lo a ni, a ti.

A fapa Chungkham Sanjit-a thihna chungchangah a nu chuan police te lakah hian complaint a thehlut a, kum 2010 khan Central Bureau of Investigation (CBI) chhui tura dah a ni.