President-in Arunachal-ah President Rule a puang

Sorkar laipuiin President Rule-a Arunachal Pradesh dah a rawtna chu President Pranab Mukherjee chuan Thawhlehni zan khan a pawmpui.

Union Cabinet meeting chuan Pathianni khan Arunachal chu President Rule-a dah a lo rawt a, ni hnih hnuah President chuan pawmpui nghal a ni.

Union Home Ministry thuchhuak chuan India danpui, Article 356 (1) tlawhchhanin, January 26 aṭangin President chuan Arunachal-ah President Rule-ah a puang a ni, a ti.

Union Minister of State for Home, Kiren Rijiju chuan Arunachal-a President Rule puan chhan chu sawifiahin, India danpui palzutna a awm vang leh state Assembly session chu thla ruk chhunga neih tawh loh a nih vang a ni, a ti.

President Rule-a Arunachal dah chungchangah Thawhṭanni khan President Pranab chuan Union Home Minister, Rajnath Singh hmuin, hemi chungchang hi an sawidun.

Home Minister Singh chuan Arunachal-a dan leh thupek dinhmun a tlakchhiat avang leh state-a rorel lai Congress sorkarin India danpui a palzut fo avangin President Rule puan ngai a ni tih a sawi.

Hetihlai hian Arunachal-a rorellai, Congress party chuan President Rule-a dah hi a dodal nghal a, politics thila Arunachal buaina chu Supreme Court-a ngaihtuah lai a nih avangin thutlukna siam hnan theih a ni lo, a ti.

State leh Central-a Congress hruaitute chuan Prime Minister Naren-dra Modi-a kaihhruai, NDA sorkar chu bei zui nghalin, sorkar laipui chu Supreme Court hmalakna ngai pawimawh lohah an puh.

"Republic Day hian India danpui leh democracy rorelna chu vuak hlum a ni a, sorkar laipui rorelna hi state leh sorkar laipui thawhhona ṭha palzutna a ni. Sorkar laipuiin Arunachal-a President Rule puan a tumnaa a chet hmanhmawh dante hi Supreme Court zah lohna lian tak a ni," tiin Congress thupuangtu, Tom Vadakkan chuan a sawi.

Union Cabinet-in Pathiannia Pre-sident Rule puan a rawtna hi Congress party chuan Thawhṭanni khan Supreme Court-ah a khinglet nghal a ni.

"President Rule-a puan rawtna chungchang chu Supreme Court-a thubuai ngaihtuah lai a nih avangin sawi theih kan nei lo a, rorelna dik erawh hlenchhuah ngei kan beisei a ni," tiin Vadakkan chuan a sawi.

Arunachal Pradesh Chief Minister, Nabam Tuki pawhin sorkar laipui thutlukna chu dan hmanga beihlet an tum thu a sawi.

"Supreme Court-ah rorelna dik kan sual dawn a, dan hmangin kan bei zel ang. Hemi chungchang hi Court-a ngaihtuah lai a ni a, hei vang hian Court thutlukna kan nghak hmasa phawt ang," tiin Tuki chuan a sawi.

Arunachal Pradesh-ah dan leh thupek dinhmun tlakchhiatna thilthleng engmah a awm loh thu sawiin, "Dan leh thupek a tlachhia a ni tih fiah thei kan awm em? Arunachal chu state ralmuang tak a ni a, dan leh thupek chu mumal lo a nih chuan Arunachal-ah kal ula enfiah rawh u, report kan lo nghak ang," tiin a sawi.

Delhi Chief Minister, Arvind Kejriwal pawhin Arunachl-a President Rule puan chu sawisel nghalin, "BJP veteran hruaitu, L.K. Advani-a'n kan ramah 'emergency' ang kha a thleng mek a ni, tia a lo sawi kha a dik a ni," tiin a tarlang.