Union Home Minister Singh-a'n President Pranab a hmu

Union Cabinet meeting-in President Rule-a Arunachal Pradesh dah a rawt chungchangah President Pranab Mukherjee chuan party hrang hrang thurawn a la mek a, NDA sorkara thuneitute pawh a biak tawh bakah Thawhṭanni khan Union Home Minister Rajnath Singh nen inhmuin, a thil ngaih pawimawh pali chhang turin a ngen.

Thawhṭanni vek khan Congress president, Sonia Gandhi pawhin President hi hmuin, Arunachal Pradesh politics buaina chungchang an sawidun.

President Pranab nena an inkhawm-naah Home Minister Singh chuan Arunachal chu President Rule-a dah a pawimawh thu a sawi a, hemi rual hian President chuan Arunachal politics buaina chungchang chu Supreme Court-a ngaihtuah a nih mek laiin eng vanga sorkar laipui chu President Rule puan rawt nge a nih tih a hriat thu a sawi.

Pranab chuan Supreme Court-a thubuai kal lai a nih avangin President Rule puan theih dan a awm em tihte hriat hmasak a duh thu a sawi bakah sorkarin member thlawptu a neih tlem huna rorel dan tur chungchanga Rajya Sabha-in rawtna a lo siam tawhte chu NDA sorkarin bawhzui a tum tihte pawh a hriat duh thu a sawi.

Singh chuan Arunachal-a dan leh thupek dinhmun a tlakchhiat avang leh state-a rorel lai Congress sorkarin India danpui a palzut fo avangin President Rule puan ngai a ni tih a sawi.

Arunachal Governor JP Rajkhowa chuan sorkar laipuia President Rule puan a rawtnaah Itanagar-a a chenna-in, Raj Bhavan kawtah rorel lai party thlawptute'n nawrh an huaihawt ṭhin thu leh dan leh thupekah harsatna an siam ṭhin thu a tarlang a, state chhunga venhimna lam tlak chhiat chhanah Chief Minister Nabam Tuki kaihhruai sorkar chu a puh bawk.

Politics-a Arunachal buaina hi Congress MLA lungawi lo 21 leh BJP MLA 11 ṭangrual te'n independent MLA pahnih hoa nikum December 16-a Assembly Speaker, Nabam Rebia paihthlak an tum aṭangin a lang chhuak a, Governor-in December 16-a session a koh hi Chief Minister Tuki hoin, MLA 26-in an boycott a, Governor session koh chu India danpui palzutna a ni, an ti.

December 17 khan Congress MLA lungawi lo 21, BJP MLA 11 leh independent MLA pahnih ṭangrual-te hi Itanagar community hall-a inhmukhawm lehin Chief Minister Nabam Tuki hi an paihthla leh a ni. Rorel lai Congress sorkar chu High Court-ah zual koin December 16-a Governor-in session a kohna chu a stay sak a ni. Arunachal-a rorel lai sorkar leh eptute buaina hi Supreme Court constitutional bench chuan a ngaihtuah mek a ni.

Union Cabinet-in Arunachal-a President Rule puan a rawtna hi Congress party Supreme Court-ah khinglet nghal a, vawiin hian hearing neih a ni ang.

Hetihlai hian Assam Chief Minister Tarun Gogoi chuan sorkar laipuiin President Rule-a Arunachal dah a rawtna chu sawiselin, sorkar laipui thutlukna chu India palzutna leh 'cooperative federalism' kalphung zah lohna a ni, a ti.

Gogoi chuan Arunachal Governor Rajkhowa pawh sawiselin, BJP leh Rashtriya Swayamsevak Sangh (RSS) worker anga awma a puh bakah Governor office zahawmna tibawrhbangah a puh.

"President Rule puan ngai khawpin Arunachal-ah dan leh thupek a tlachhe lo a, hei bakah hemi chungchang hi Supreme Court-a thubuai kal lai a nih avangin thutlukna dang siam hnan theih a ni lo," a ti.

Arunachal-a thilthleng chuan Prime Minister Narendra Modi-a kaihhruai dawhtheih loh zia a tilang chiang hle a ni, tiin Gogoi chuan a sawi bawk.