Hmasawnna chu ṭhalaite kutah a innghat: Sonowal

Union Sports and Youth Affairs Minister, Sarbananda Sonowal chuan Dibrugarh University-a zirlaite hmaa thuchah a sawiah ram hmasawnna chu ṭhalaite kuta innghat a ni, a ti.

"Ṭhalaite'n tha an thawh loh chuan khawtlangin hma a sawn thei lo a, khawtlang nun siamṭhat kawngah
ṭhalaite'n mawhphurhna an la tur a ni. Assam chu state hmasawn leh chak ber siam kan duh a nih chuan a tana theihtawp chhuah turin thu kan tiam a ngai a ni. Hmasawnna chu a thu mai ni loin thawhrimna hmangin kan thlentir tur a ni," a ti.

Prime Minister Narendra Modi-a kaihhruai, NDA sorkarin scheme hrang hrang- Skill India, Make in India leh Digital India scheme a duante chu tarlangin Sonowal chuan sorkar laipui chuan ṭhalaite chu kutthemthiamna hmanga thuamchak a tum thu leh hna nei loa ṭhalaite awmtir a tum loh thu a sawi.

Nehru Yuva Kendra Sangathan leh National Service Scheme ṭangrualin ṭhalai leh zirlaite puala ‘Skilled Youth - Empowered Assam’ thupuia hmanga Dibrugarh University-a hun an buatsaihah hian upper Assam district panga
aṭangin college zirlai 3000 chuang an tel.