Hmarchhak tel loin India-in hma a sawn thei lo: Acharya

Assam leh Nagaland Governor, PB Acharya chuan hmarchhak tel loin India-in hma a sawn thei lo tih sawiin, hei vang hian sorkar laipui chuan hmarchhak bial hmasawnna chu a ngai pawimawh a ni, a ti.

Republic Day vawi 67-na puala state pahnih mipuite hnena thuchah a sawiah Governor Acharya chuan he thu hi a sawi a, hmarchhak biala infrastructure tih-changtlun nan theihtawpa hmalak mek a ni, a ti. Governor chuan Look East leh Act East policy a taka tipuitling turin mipuite chu ṭangrual turin a ngen nghal.

Hmarchhak bial chuan leilung hausakna a neih thu sawiin, heng leilung hausakna chhawr thiam thei turin university te pawhin hmarchhak biala zirlaite zirlai an buat-saih sak a ngai a ni, a ti.

"Organic farming, ramngaw hausakna leh ni tha chakna siamchhuahna lama hmarchhak bial theihna tak tak hai-chhuah chu mitin thil ngaih pawimawh tur a ni a, Nagaland chuan ' E' pathum- education, electricity leh employment lamah theihna nasa tak a nei a, hemi hmang hian state hmasawnna chak takin a kalpui theih dawn a ni," a ti.

"Kan chakna chu chi hrang hrang kan nih ruala kan lungrualna hi a ni," tiin Governor Acharya chuan a sawi.

January 26, Republic Day chu Naga mi, India ram tana zalenna sualtu, Padmashree Rani Gaidinliu piancham a nih bawk avangin zahna lantir ṭheuh turin mipuite a ngen nghal.

"Kum 2016 chu Naga-land tan kum pawimawh tak a ni a, remna leh hmasawnna kan duh a ni. Remna leh muanna awm theihna atana kan beihna kawngah mitin kan ṭan-rual a ngai a ni," tiin Acharya chuan a sawi.