Manipur CM ban turin Congress President-in PM Modi phût

Congress party president Mallikarjun Kharge chuan nimin khan social media kaltlangin Manipur tualchhung buaina thleng mekah state leh central-a BJP kaihhruai sorkar chu na takin a bei leh.

Mallikarjun Kharge chuan Manipur chungchanga a la ngawih chhunzawm zel avangin prime minister Narendra Modi a bei leh bawk. Manipur buainaah naupang leh hmeichhiate hmanruaah hman an ni tiin, BJP chuan Manipur chu a ngaihsak lo a, indona hmunah a chhuah a ni, a ti. PM Modi chu Manipur CM nih tling lo, N Biren Singh CM a nihna aṭanga ban tura a phut thu a sawi bawk.

Kharge chuan Manipur mipuite tawrhna chuan ni 147 a tling tawh a ni tiin,"Buaina chhuahna hmuna zirlaite khawih an ni chuan ram pum a nghawng a, hei hian Manipur buainaah hian hmeichhia leh naupangte chu hmanruaa hman an nihna a tichiang a ni. Heti chung hian PM hian Manipur hi a la tlawh hman lo a, BJP hian Manipur hi indona hmuna chhuahin an ngaihsak miah lo a ni. Manipur buaina tihreh an duh tak zet chuan Modi hian Manipur CM hi ban vat rawh se," tiin Kharge hian social media-ah a tarlang. Congress hian Manipur tualchhung buaina avang hian central-a BJP sorkar hi a lo bei fo tawh a, Prime Minister-in Manipur a la tlawh lo chu an zawhna lian ber a la ni chhunzawm zel a ni.

Thawhlehni zan khan Imphal-a Singjamei area-ah Rapid Action Force (RAF) leh zirlai naupang pahnih thihna avanga nawrh huaihawtte inkarah buaina chhuakin RAF-te hian tear gas te an hmang a, rubber silai mute hmang bawkin pung khawmte hi tihluihnain an hnawt darh a, mi 45-in hliam an tuar bawk a ni. Buaina a chhuah leh hlauhna avang hian Imphal-ah hian Manipur police leh Central Reserved Police Force (CRPF) te dah luh belh an ni bawk.

Zirlai 2 thihna CBI-in chhui dawn

Manipur-a internet tihnun a nih leh hnu rei loteah July 6-a Bishnupur bula aṭanga bo zirlai pahnihte ruang thlalak a darh a, an ruang tak erawh hmuh a la ni lo. Zirlai pahnih, Meitei zirlai ni ngeia hriatte thihna chungchang chhui tur hian Central Bureau of Investigation (CBI) Special Director, Ajay Bhatnagar leh officer ṭhenkhatte chuan Nilaini khan Manipur an pan.

August thlaa Manipur sorkarin Supreme Court-a report a theh luhah zirlai pahnihte hi Kuki misual tute'n emaw an hruai nia hriat a ni. Thlalak darh pakhat zawkah hian naupang pahnihte hi thu dunin, an hnung lamah ralthuam keng an lang a, thlalak pakhat zawkah hian lung bula an ruang awm hmuh a ni leh a ni. Manipur sorkar chuan Thawhṭanni tlai tawh takah khan thuchhuah siamin, zirlai pahnih thihna chungchang chhui chiang tur hian central agency leh state police-te an thawh dun tur thu a sawi.

Mobile internet titawp leh

Tualchhung buaina avanga thla nga zet mobile internet tihtawp a nih hnuah Manipur sorkar chuan September 23 khan a hlip a, mahse, social media kaltlanga zirlai naupang pahnih rawng taka thahte thlalak a darh avangin Thawhlehni aṭang khan internet khapna hi kalpui lehin Pathianni thleng a awh ang.

July thlaa boa report tawh zirlai naupang pahnihte thlalak hi internet ban hlih a nih hnu rei loteah darhin hei vang hian Thawhlehni khan zirlai eng emaw zat pung khawmin zirlai pahnih rawng taka thah an nih avanga an lungawi lohna lantirna atan kawng an zawh a ni. Zirlai kawng zawh leh Rapid Action Force (RAF) te hi innawr buaiin kawng zawh zinga mi 45 zet chuan hliam an tuar. Zirlaite lungawi lohna avang leh Thawhlehni zana buaina chhuak avang hian Manipur sorkar chuan nimin khan school zawng zawng tan chawlh a puang a, mahse, Imphal-a school awmte chuan anmahni school ṭheuha lungawi lohna lantirin an pung khawm.

Thuneitute chuan Singjamei-ah chuan dawrte hawn niin motor-te pawh tlan mah se boruak dai rih si rit tak si a awm niin an sawi. Manipur sorkar pawhin Imphal East leh Imphal West district-ahte chuan September 27-ah mipuite'n mamawh ei tur leh damdawi lak khawmna hun an neih theih nan curfew thlah dul a nih thu a puang.