Assam leh Meghalaya ramriah buaina chhuak

Meghalaya West Jaintia Hills district leh Assam West Karbi Anglong district inrina, Lapangap khuaah Thawhlehni tlai khan buaina chhuakin, tun dinhmunah thi leh hliam an awm hriat a ni lo niin official-te chuan an sawi.

West Jaintia Hills district thuneitute chuan Assam West Karbi Anglong district-a thuneitute nen an inbiak thu sawiin, niminah chuan boruak ṭha zawk an nei tawh niin an tarlang.

Thawhlehni tlaia buaina chhuahna hmun hi Assam leh Meghalaya ram inchuh lai a ni a, buaina chhuahna hmuna cheng, Assam lam mi leh Meghalaya mite chu thal leh sairawkherh hmangin an inbei niin thuneitute chuan an sawi. State pahnihte police chu buaina chhuahna hmunah hian thleng nghalin, an mite ve ve chu an khap dai thei rih a ni. Police-te chuan buaina chu reh rih mah se, boruak a la rih thu an sawi a, khaw tual mite chu buaina chhuahna hmuna an pun khawm phal an ni rih lo bawk.