Nagaland leh AP hmun ṭhenkhatah AFSPA pawtsei

Ministry of Home Affairs (MHA) chuan Thawhlehni khan thuchhuah siamin, Nagaland leh Arunachal Pradesh hmun ṭhenkhatah Armed Forces (Special Powers) Act (AFSPA) hman mek chu October 1 aṭanga hman ṭan turin, thla ruk atan a pawhsei leh.

Home Ministry thuchhuaha tarlan a nih danin AFSPA hi Nagaland-a district pariat; Dimapur, Niuland, Chumoukedima, Mon, Kiphire, Noklak, Phek leh Peren pumpuiah hman chhunzawm tur a la ni dawn a, heng bakah hian district dang pangaa police station 21 huam chhungah hman chhunzawm tur a la ni dawn bawk a ni. Arunachal Pradesh-ah chuan AFSPA,1958 section 3 hnuaia 'distrubed area'-a puan, Assam ramri hnaiha awm, Namsai district chhunga Namsai, Mahadevpur leh Chowkham police station huam chhunga mi, Tirap, Changlang leh Longding hmunahte hman chhunzawm tur a ni thung. Hei hi thu leh a awm a, sut a nih hma chuan tihdanglam a ni dawn lo niin Home Ministry thuchhuahah hian tarlan a ni bawk. He thuchhuah hi kumin March thlaa notification chhuah tawh pawhseina a ni.

April 1, 2022 khan MHA hian Assam, Manipur leh Nagaland-a 'disturbed area'-a a puante hi a lo titlem tawh a ni. Tripura-ah kum 2015 khan AFSPA hi a lo hlip tawh a, Meghalaya pawh AFSPA hnuaiah hian kum 27 zet awmin, April 1, 2018 Home Ministry chuan a hlip tawh bawk.