Dalai Lama-a'n Sikkim tlawh dawn

Tibet ram sakhaw hruaitu, Dalai Lama chuan October 11 leh 12 chhung hian Sikkim sorkar sawmna anga Sikkim tlawh a tum thu leh, Paljor stadium-a mipui hmaa thusawi a remtih thu a sawi.

Dalai Lama hian Paljor stadium-ah hian ni 2 chhung thu a sawi dawn a, a thusawi ni hmasa zawkah hian '37 practices of a Bodhisattva' chungchang chu a sawi ber tur a ni a, a ni hnihnaah hian Guru Padmasambhava kaihhnawiha Guru Yoga tite tana pawimawh 'Empowerment of Guru Padmasambhava' chungchang a sawi leh dawn a ni. Dalai Lama office lam hian Sikkim-a hun a hman tur atan hian ni hnih dah mah se, Sikkim sorkar chuan ni nga chhung, October 14 thleng cham turin a beisei thung a. October 10-ah Sikkim thleng tura beisei a ni a, October 13 leh 14-a a programme tur chu la puan leh rin a ni.

Sikkim-ah hian Buddhist sakhaw zuitu tam tak an awm a, an zinga a tam zawk hian Dalai Lama hi an sakhaw hruaitu leh an thlarau kaihruaitu angah an ngai a ni.