Governor Rajkhowa-a'n min vau: Tuki

Arunachal Chief Minister hlui, Nabam Tuki leh Governor JP Rajkhowa chu thu hmanga inbei chhunzawm zelin, Tuki chuan a cabinet minister te nen Rak Bhavan-a an hmuh ṭumin Governor Rajkhowa chu amah vau a, a laka ṭawngkam mawi lo tak hmangah a puh.

Tuki chuan nikum June 1-a Rajkhowa-a'n Arunachal Governor hna a chelh aṭangin vawi eng emaw zat India danpui palzutah a puh bawk.

"Raj Bhavan-a kan hmuh
ṭumin Governor Rajkhowa chuan min vau a, ṭawngkam mawi lo taka min hman khum bakah kan meeting chu video-in a lo record bawk a ni," a ti.

Tuki chuan video-a an mee-ting record chu amah leh a minister te'n an hriat loh thu sawiin, Governor-in a inhnial buai lai video a tlangzarh chu an edit hnu a nih thu leh thilthleng tak tak a lan kim loh thu a sawi bawk.

"Governor hmu turin appoint-ment kan siam a, Raj Bhavan kan kal ṭum hian security check kan paltlang bakah kan chettlat dan chu video-a lak vek a ni. Keini chuan pangngai takin biak kan tum a, mahse ani chuan min tih thinrin a lo tum a, ka hming lama min koin ṭawngkam mawi lo tak tak min lo hman khum a ni. Video footage an tlangzarhah chuan thilthleng a lang kim lo a, an edit-naah thilthleng ṭhenkhat chu an paih a ni," tiin Tuki chuan a sawi.

Governor Rajkhowa hian Arunachal-a President Rule puan a rawt chhan tun hnaia a tarlanah Chief Minister hlui Tuki leh a minister te chu amah vau a, chi inthliarna lam hawi
ṭawngkam hmangah a puh a ni.

Rajkhowa chuan minister
ṭhenkhat chu amah kutthlak tumah a puh bawk a, amah leh a chhungte chu dinhmun hlauhawma an awm thu leh hna a thawh theih loh thu a tarlang bawk.