Sarbananda-a'n a thil tum a puang

Assam Assembly inthlan lo awm tura BJP Chief Ministerial candidate, Sarbananda Sonowal chuan state mipuite tana thil tih a tumte a puang.

Sonowal chuan Assam mite nihna (identity) hum-halh leh eiruk awm lohna sorkar din chu BJP thil ngaih pawimawh ber a nih tur thu sawiin, Congress party leh All India United Democratic Front (AIUDF) tiam loin party dangte chu inthlanah an thawhpui theih thu a sawi. BJP chuan Bodoland People's Front (BPF) nen thawhhona thuthlung an ziah tawh thu a sawi bawk a, Asom Gana Parishad (AGP) nen inbiakna an nei mek tih a sawi bawk.

Union Sports Minister leh Assam BJP presdent hna chelh lai Sonowal chuan Assam mipuite harsatna chinfel chu BJP thil tum ber a ni tiin a sawi a, kum 15 chhung rorellai Congress sorkar rorelna dik lo leh eirukna chu state mipuiin an tuar a ni, a ti.

Congress sorkar thu tiamte chu lehkhaah chauh a awm tih sawiin, langtlang taka state sorkarin scheme ṭhenkhat a kal pui loh avanga Supreme Court-in scheme kalpui a khapsak chu Congress sorkar eirukna tichiangtu a ni, a ti.

Sonowal chuan state Assembly inthlan lo awm tura BJP candidate list chu thla thar hian a thawh khatna puan a nih tur thu a sawi a, party hruaitu tumah ticket pek an tiam loh thu sawiin, hnehna chang thei tur hnenah chauh party ticket pek a nih tur thu a sawi.