DAN sorkar a hlawhchham: NPCC president

Nagaland Pradesh Congress Committee (NPCC) president, K Therie chuan rorellai Naga People's Front (NPF) kaihhruai, Democratic Alliance of Nagaland (DAN) sorkar chu kawng engkima hlawhchhamah a puh.

"Kum 12 an sorkar chhungin DAN sorkar chu kawng engkim-ah a hlawhchham a, sum leh pai enkawlah hlawhchham bawkin Nagaland chu sum lama harsatnaah a hnuk lut a, mi naran tan eizawn a harsat phah a ni," tiin Therie chuan a sawi.

NPCC chuan ‘Road Map’ tih lehkhabu a buatsaihah NPF chu chi inthliarna politics kalpuiah a puh bawk a, politics-a BJP thil tum leh kalphungte Naga ṭhalaite hmaa thehdarhah a puh bawk.

NPF leh BJP thawhdunna chu Naga hnam leh sakhaw himna atan a hlauhthawnawm a ni, tiin Therie chuan a sawi bawk.

"Prime Minister Narendra Modi-a kaihhruai sorkar a din aṭangin ram pumah sakhaw inthliarna nasa tak a thleng zui nghal a, sakhaw te zawk, Kris-tiante ngaihtheih lohna nasa tak a thleng bawk a ni. Krismas ni chu Good Governance Day-a hman a nih bakah Good Friday chu Judges’ Conference Day-ah hman a ni bawk a, Hindu te'n an sakhuaa kir lehna hun, Ghar Wapsi an buatsaih bawk a, India ram hmun hrang hrangah Kristiante biak-in leh school te chu suasam a ni bawk," tiin NPCC thuchhuak chuan a tarlang.