Union Agri Minister-in Assam a tlawh

Union Agriculture Minister Radha Mohan Singh chuan kar kalta Inrinni khan Assam tlawhin, Rani-a Indian Council of Agricultural Research (ICAR) hnuaia mi, 'National Research Centre on Pig' a tlawh.

Union Minister Radha chuan Guwahati-a chanchinbu mite a kawmnaah Assam sorkar chu sawiselin, mi ṭhenkhat duhsak bikah a puh a, state sorkar project hrang hrang kalpui dan chu ṭha tawk lo a tih thu leh eiruk do kawngah khauh tawk lo a tih thu a sawi.

Radha chuan sorkar laipuiin project kalpuina atan fund a pekte chu a tihpunsak thu a sawi a, mahse state sorkar chu scheme kalpuinaa chak tawk loah a puh.

Rani hmuna 'National Re-search Centre on Pig' chu zauh a duh thu sawiin, "Pig centre zauhna atan hian ram bigha 10-a zau kan mamawh a, mahse Assam sorkar chuan ram bigha khat lei nan cheng nuai 1.60 a phut a ni. State sorkarte chuan hetianga centre din nan chuan a thlawnin ram an pe ṭhin a ni a, hetihlaia Assam sorkar kal dan hi thil mak tak a ni," tiin a sawi.