Manipur : AFSPA pawhsei danah tribal-te lungawi lo

Manipur hill district-a cheng, Kuki, Zomi leh Naga tribal intel khawm chuan Manipur sorkarin Armed Forces (Special Powers) Act (AFSPA) thla ruk chhunga a pawhseiin hill district chauh a huam chu an lungawi loh thu leh an pawm loh thu an sawi.

Manipur-a Zomi intel khawm lian ber, Zomi Council chuan Union Home Minister hnenah memorandum an theh luh nghal thu sawiin, Manipur sorkarin inṭhen hranna leh inthliarna rilru a pu chu an duh loh thu an tarlang. Kuki Inpi leh United Naga Council pawhin AFSPA pawhseiin valley district a huam ve lo chu an hriatthiam loh thu leh, sorkar thil tihdan chu inrahbehna leh ṭan lam nei a ni tih an sawi ve bawk.

Zomi Council chuan Union Home Minister hnena an memorandum theh luhah hian Manipur sorkarin state chhunga scheduled tribe-te a en hran zia leh, hei hi AFSPA pawhsei an huamtir china Meitei tamna leh Meitei ram chin a tel ve lo chuan a lantir chiang hle niin an sawi a, thuchhuah thara police station huam chin an tih, AFSPA-in a huam tel loh tur an dah thar pawh Meitei firfiak, ralthuam nena che ṭhin, Arambai Tenggol leh Meitei Leepun te chettlatna hmun a nih thu an sawi. Zomi Council hian Manipur-a May 3 aṭanga tualchhung buaina a chhuah hnua mitthi zawng zawng 175 aṭanga 80% hi AFSPA-in a huam loh chhunga thleng vek a ni a, heng hmunte hi 'distrubed area'-a puan tur zawk a ni, an ti.

Manipur Kuki Inpi secretary, H. Gangte pawhin,"Thil nihna dik takah chuan valley district hi buaina chhuahna hmun, disturbed area zawk a ni. Nawrhna zawng zawng tharum thawhnain a zui a, venhimna hna thawktute pawhin mipui hnawh darh nan tear gas leh tharum an hman a ngaih chang a awm hial a ni. Helai tribal area-ah erawh chuan boruak a ralmuang a, tun thla liam ta chhung pawh khan lungawi lohna emaw, khawtlanga buaina engmah a awm lo," a ti.

United Naga Council general secretary, Vareiyo Shatsang chuan hill area-te hi an ralmuang tlangpui a, NSCN (I-M) te pawhin remna leh muanna a awm theih nan sorkar chu inbiakna a neihpui mek a ni. "Valley-ah chuan AFSPA hi hman a ni ve lo. AFSPA hrim hrim valley-ah hman ni se tih hi kan duh a ni lo, inthliarna a awm tih lantir lutuk a hill district chauha hman a ni zawk hi kan hrethiam lo," tiin a sawi.