Manipur CM leh state BJP President chenna in bei
Meitei zirlai pahnih thah an nih chungchanga lungawi lohna lantira pung khawm mipuite chuan Ningani khan Manipur chief minister N. Biren Singh chenna in, Imphal East Heingang-a awm chu luh chhuah tumin an bei niin sorkar official chuan a sawi.
CM chenna in bulah hian Central police, Rapid Action Force (RAF) te dah an ni a, CM in aṭanga ral khatah mipui pung khawmte hi dan niin hnawh darh an ni tih an tarlang.
Mipui pung khawmte hian sorkarin Meitei zirlai pahnih thihna a chhui muang lutuk an duh loh thu an au chhhuahpui a, Kuki hmeichhe pahnih chungchanga hmalakna chak taka kalpui a nih laia, Meitei zirlai pahnih tualthihna chungchanga CBI leh police-te an che muang chu an hriatthiam loh thu an aupui.
Hetih lai hian Manipur state BJP president, A. Sharda-i chuan zirlai pung khawmte'n Nilaini zana a in an beih thu leh a vahnuin hliam a tawrh thu a sawi. "Tun hi ka in an beih ṭum rukna a ni tawh, lungte'n an rawn vawm a, beih leh kan ni lo ang tih a sawi theih loh. Zirlaite hi an thinrim tak zet a, hmeichhe pahnih saruaka kawng zawhpuite anga an tana hmalakna a chak lo chu an hrethiam lo a ni," tiin a sawi.
Meitei zirlai pahnih thihna avanga rorelna dik duha kawng zawhte hnawh darh nan police chuan tharum leh hmanrua an hmang nasa nia complaint awm chu chhui chiang turin DGP Rajiv Singh chuan committee din a nih thu a sawi. He committee hi Inspector General of Police, Administration, K. Jayanta Singh chuan a kaihruai dawn a, a rang thei ang bera report theh luh tur a nih thu a sawi bawk. Manipur police-te chuan Central Armed Police Force (CAPF)-a senior official-te chuan zirlaite leh venhim hna thawktute zinga hliam tuar an awm chu pawi an tih thu an sawi a,"Dan keng kawhtute thu zawm hram hram turin zirlaite kan ngen duh a, misual tu emaw, pawikhawihna atana hetiang hun remchang lo la duh an awm a nih chuan dan ang taka hrem an ni bawk ang. Keini lam pawhin mipui nena innawrna kawngah tharum thawh lo thei anga bera che turin sawihona kan nei ve bawk a ni," tiin an puang.