British MP 22-in India nena FTA talk neih tihtawp phût

British Parliament-a House of Commons MP 22-te chuan Manipur-a buaina thleng mek leh, human rights nasa taka palzut a nih avangin India sorkar nena Free Trade Agreement (FTA) neih mek chu titawp turin United Kingdom (UK) sorkar an phût.

Punjabi -origin British MP Nadia Whittome chuan Parliament-ah early day motion (EDM) hi pu lutin, lawmaker dang 21-te'n an hming an ziak bawk. UK sorkar chu FTA chungchanga India sorkar nena inbiakna a neih mek titawp tura an phut bakah, Manipur-a human rights palzut a nih dante chu India sorkara thlen turin an ti bawk.

EDM-ah hian Manipur-a buaina thleng mekah mihring dikna chanvote nasa taka palzut a ni a, thuneitute hriatpuinaa inthahna thlengin, chenna in tihchhiat a ni a, mi tam tak tlanchhiat ngaia awmin, nghaisak te an tawk a, a bikin tribal hnam leh Kristian tamna, Kuki-Zo mite chu bitum an ni bawk a ni, an ti. Whittome chuan EDM a put luh chhan hi sawiin, 'Manipur-a Kuki-Zo te tawrhna thleng mek leh, India ram hmun danga sakhua leh hnam zawkte tawrhna thlengte chu khawvelin a dem a ngai a ni," a ti.