Assam-Meghalaya : Mukroh inkahna thleng CBI chhuitir dawn

Assam leh Meghalaya sorkar chuan nikum November thlaa state pahnih inrina, Mukroh-a inkahna thleng chungchang chu Central Bureau of Investigation (CBI) chhuitir an remti.

Kum 2022 November thla khan Mukroh-ah hian Assam Forest Protection Force chuan Meghalaya aṭanga thing tawlh ru nia puh mi ṭhenkhatte chu silaiin an kap a, a hnuah buaina a chhuak zui a ni. He buaina chhuakah hian mi paruk an thi a, panga chu civil mi niin forest guard pakhat a thi tel bawk.

State pahnihte hian ramri buaina an neih, hmun 12 zinga hmun paruka inremna an siam hnu lawkah he buaina hi a chhuak a ni.

Assam chief minister Himanta Biswa Sarma leh Meghalaya chief minister Conrad K. Sangma-te chu Inrinni khan Guwahati-ah an inhmu a, meeting zawha chanchinthar lakhawmtute a kawmnaah Assam CM chuan,"State pahnihte chuan he thil thleng chungchang chhui tur hian judicial commission an din ve ve a ni. Mahse thil chhuinaah Assam lama witness-te chu Meghalaya-a hearing neihnaah a inlan duh lo a, chutiang bawkin Assam-a thubuai ngaihtuahnaah Meghalaya lama mite an inlan duh lo bawk. Hei vang hian chak zawk leh mipuite rin ngam tura chhuizui a nih theihna atan central agency kuta hlan hi kan duh zawk a ni," a ti. State pahnih sorkar hian CBI chu thubuai ziah luhna atan pawh Guwahati leh Shillong hmang loin, hmun dang thlang turin an ngen bawk tih Sarma chuan a sawi. Case hi Delhi emaw, Kolkatta-ah emaw ziak lut zawk turin an ti a ni.