Nagaland : Post card hmangin lungawi lohna thlen

Nagaland, Kohima-a Centre for Development Initiatives (CDI) leh Ferrando Domestic Workers Alliance te chuan nimin khan Nagaland-a domestic worker-te tan Post office headquarter-ah Postal card campaign an nei. Kohima-a postmaster, L. Simte chuan domestic worker-te'n post card hmanga an ngenna chu sorkar beng thleng ngei se a duh thu a sawi.

He campaign kaltlang hian mimal, pawl leh sorkar anga domectic worker-te ngaihsak leh chawisan tum a ni. Kal khawmte chuan Nagaland Chief Minister, labour commissioner, department of social welfare leh Kohima deputy commissioner te hnenah an thil duh leh phutte ziakin, post office kaltlangin an thawn a ni.

Nagaland Superin-tendent of Post Office, L.Tiken Singh chuan kal khawmte hmaah hian thu sawiin, domestic worker ṭhenkhat chu professional an nih thu sawiin, khawtlang faina leh in chhungkhur enkawlna kawnga an hnathawhte avangin anmahni ruaitute chuan hahdam leh zangkhai zawka hna an thawh theih phah thu a sawi. Chutih rualin domestic worker-te chuan harsatna hrang hrang an tawh ve thu sawiin, dan hmanga humhim an nih tawk loh ziate, endawng leh enhniam an tawh thu te, ṭanpuina an dawn nep thu leh ngaihsak leh ngaihhlut an nih tawk lohnate chu nitina an hnathawh ṭhat nen a inhen loh thu a sawi bawk.