Assam district paliah chiah AFSPA hman a ni tawh : DGP

Assam DGP, GP Singh chuan Armed Forces (Special Powers) Act (AFSPA) chu October aṭang chuan state chhunga district paliah chiah hman a nih tawh tur thu a sawi.

Guwahati 4th APBN Kahilipara hmuna Assam Police Day hmannaah DGP hian thu sawiin, October 1 aṭang chuan district pali - Dibrugarh, Tinsukia, Sivasagar leh Cahraideo district-ahte chauh AFSPA chu hman a ni tawh dawn a ni, a ti.

Assam Police Day hi Intelligence Bureau (IB) director, Tapan Kumar Deka chuan special guest anga hmanpuiin, Assam police-te ṭhahnemngaihna leh thawhrimna avanga state chhunga ralmuanna awm chu a fak. Assam chuan firfiak leh ralthuam hmanga chetna nasa tak a tawh chhoh mek laiin state police-te thawhrimna avangin chungte chuan an ralthuamte pe lutin anmahni ngei pawh an inpe vek tawh niin a sawi a, ruihhlo tawlh ru leh dan kalha ruihtheih thil la kual ṭhinte pawh state police te chuan an man nasat thu a sawi. Tapan Deka chuan Assam police-te chu ram pum huapa hriat leh chawimawi hlawh tlak an nih thu an sawi bawk.