Pathiannia cleanliness drive neih TNL-in dem

Manipur-a Tangkhul pawl lian ber, Tangkhul Naga Long (TNL) chuan prime minister Narendra Modi-a'n nimin, Pathiannia ram pum huap faina beihpui thlakna nei tura a ko chu ram chhunga Kristiante hmuhsitna an ti.

Hemi hma hian Nationalist Socialist Council of Nagaland (NSCN) chuan Pathianni khera cleanliness drive neih tura ruahmanna siam chuan Kristian sakhaw zuitu, Naga-te rilru a tina hle tiin an lo sawi tawh. Faina beihpuithlakna neih tur chu thil ropui tak ni mah se, Kristiante ni serh, Pathianni ni khera neih tura Prime Minister ngenna chu Kristian an nihna angin Naga-te chuan an zawm thei lo tih an sawi.

NSCN-IM chuan, "Naga mipuite chuan India rama sakhaw hrang hrangte inzah tawnna palzut zawnga cleanliness drive buatsaih tur a dodal a ni" tiin, Kristian rinna palzut leh dal zawnga hmalakna leh policy siamte chu ngawi rengin an thlir liam dawn lo tih an sawi. Naga-te chuan Prime Minister thu zawma Pathian duh loh zawnga thiltih an thei lo a ni, an ti.