BJP in Ibobi bang turin phût

Manipur BJP chuan Chief Minister Okram Ibobi Singh chu kum 2009 a police-ten tlangval pakhat, hel anga an kahhlumna thil kha lemchan mai a nih vangin mawhphurhna laa bang nghal turin an phut.

"Ibobi Singh hian thuneihna chelh turin dikna a nei tawk tawh lo. Dan hmaa pharh tawh, sorkar lehkha pawimawh ziahluh tawhte a khawih danglam thiang lo," tiin Bharatiya Janata Party, Manipur Unit hruaitu Thounaojam Chaoba chuan a sawi.

Kum 2009, July 23 khan Sanjit Meitei (22) chu hel pawl, People’s Liberation Army mi leh sa nia puhin damdawi dawrah thah a ni a, hetih lai hian Ibobi Singh hian Home a chelh lai a ni. Manipur Police head constable Thounaojam Herojit chuan January 25 khan Sanjit a kahhlum dan puangchhuakin, an hotupa additional superintendent of police (Imphal West) Akoijam Jhalajhit thupekin a kaphlum tih a sawi.

Jhalajhit erawh chuan Herojit thusawi hi a diklo tiin a pha thung.

Thounaojam Chaoba chuan Chief Minister Ibobi Singh chu bang ngei turin an phut a, an thil phutah an dinnghet tlat dawn tih a sawi.

"Akoijam Jhalajhit pawh hi suspend a ni ngei tur a ni. Herojit sawi angin khatih laia Addl. SP hna chelhtu niin Sanjit kaphlum tura thupetu a ni" tiin Chaoba chuan a sawi. BJP chuan khatih laia DGP Yumnam Joykumar pawh a inrawlh ngei nia an hriat thu an sawi bawk.

Manipur BJP hian Congress president Sonia Gandhi chu Ibobi Singah ban ngei turin an phût bawk.

Chaoba chuan kum 2009-a thil thleng, lemchan mai mai a nih chungchang hi Manipur sorkar hian engmah an la sawi duh lo nia sawiin, February ni 6 hian "Manipur lungrualna" kawngzawh runpui an huaihawt dawn tih a sawi.

Manipur sorkar hian sorkar laipui hnenah Naga inremna siam turah aw an thawh ve tur a ni. Naga inremna tur hian Manipur-a chengte nun a nghawng buai theih avangin tun hi aw neih hun a ni tiin Chaoba chuan a sawi bawk.