AP-a case CBI leh NIA kuta hlan tur a ni: Governor

Arunachal Pradesh Governor Jyoti Prashad Rajkhowa chuan state chhunga case ṭhenkhat chu CBI leh NIA chhui tura thawn mai ṭha a tih thu a sawi.

Jan Andholan Commi-ttee leh People’s Party of Arunachal ten an hmuh ṭumin, Governor chuan case pawimawh bik hi chu NIA leh CBI hnenah a rang thei ang bera thawn ni se a ṭhat zawk tur thu a lo sawi a ni.

Governor chuan ram inrelbawlna leh, dan leh thupek kenkawh kawnga sorkar thuneitu ṭhenkha-tin mutan tam tak an siam ṭhin chu tihfel thuai a duh tih a sawi bawk.

AP-a President rule puan a nih chungchang sawilangin, Governor chuan emergency thleng thei tur venna ṭha ber a ni thu a sawi. "Reilote hnuah mipui thlanchhuah rorelna a awm ngei dawn a ni" a ti.

Rorelna ṭha a awm theih nan leh eirukna do turin eng zat pawh sen ngai se, dan leh thupek kenkawh nan tih theih apiang tih a ni zel ang tiin Governor chuan a sawi a, mipuite ṭha taka dawr tur dan leh thupek kengkawh ṭha turin sipai leh police lam pawh hriattir vek an ni tawh a ni, a ti.

JAC member-te hian an state chhunga eirukna hluar lutuk tirem turin governor hi an ngen. PPA president Kahfa Bengia chuan President rule puan a ni chu an party chuan an thlawp tih sawiin, mimal rorelna vengtu tur a nih thu leh governor lakah beiseina an neih thu a sawi.

Sorkar laipui chuan thla khat chhung zet rorelna a awm mumal tawh loh avangin January 26 khan Arunachal Pra-desh hi President's rule hnuaiah a dah a ni.

Nimin khan Congress party in presidents rule-a Arunchal Pradesh dah anih chhan a khinna chu Supreme Court chuan a ngaithla. Sorkar laipui chuan president rule-a dah a nih chhan hi a sawifiahna a thawn tawh a, Ministry of Home Affairs in a sawifiah dan chuan, AP ah hian sorkar inrelbawlna leh dan leh thupek kenkawhna chu a mumal lo pumhlum ṭhak niin an tarlang. Governor in President hnena a thu thlen paruk, emergency puan a ṭulna chhan leh ram rorelna nghetlo tihte he affidavit ah hian tarlan a ni bawk.