Manipur-ah tiamchin awm loin kawng dan

Zirlai pawl pahnih, Kuki Students’ Organisation (KSO) leh All Naga Students’ Asso-ciation, Manipur (ANSAM) chuan nizan zanlai aṭang khan tiamchin awmloin kawngpui an dang. He bandh hian NH-2 (Dimapur-Moreh), NH-37 (Imphal-Jiribam ) leh NH-150 (Jesami-Mizoram) a huam.

Kawngpui dan hian khualzin phur state danga kalchhuak chu turte a huam tel lo a, bungrua leh eitur phurlut erawh engti kawng maha tlang tir an tum lo. Zirlai pawl pahnih hruaitute chuan mipui thlawpna an ngen a, he thil hi "hmalam hun atan" a pawimawh niin an sawi.

KSO GHQ leh ANSAM chuan thuchhuah inṭawm siamin, kawngpui danchah hi Direc-torate of Education-in tlang rama zirtirtu 772 , a nghet loa thawkte dahnghet tura an ngenna sorkarin a tihhlawhtlin loh vang niin an tarlang.

A nghet loa thawk zirtirtute hi Directorate of Education (S) Hills-in kum 2006 a a lakte an ni a, tlangrama sikula thawk tura rawih an ni. January 21 khan an hun hi sorkarin a titawp a ni.

Hetih lai hian United Naga Council pawhin February 4
aṭangin darkar 48 awh kawngpui danchah a tum ve bawk. UNC in kawngpui danchah a tum chhan ber chu nikum August 31-a Manipur Assembly-in 'anti tribal bills' pathum a pass duh lohna lantirna a ni. He bill pass a nih vanga buaina chhuakah tlang mi pakua zetin nunna an chan.

February 6 hian pawl hrang hrang aiawh chuan kawngzawh runpui huaihawt an tum ve bawk. Kawngpui danchah hian he kawngzawh tum hi a tibuai dawn a ni.

Zirlai pawl pahnihin kawng danchah an tum thu an puan
aṭangin Manipur-ah chuan mipui nunphung a buai hle a, tuialhthei man pawh a pung nasa hle, petrol pump te pawhin 'petrol awm lo' tiin an tar nghal a ni.