Assam : KMSS in political party thar din ta

Assam-a peasant organisation, Krishak Mukti Sangram Samiti (KMSS) leh tualchhunga pawl hrang hrang 70-te chuan kar liam ta Zirtawpni khan political party thar an din chu an puang ta. Party thar hi a hming 'Rajjor Dal' (the people's party) tiin an vuah. 

KMSS president Bhasco De Saikia chuan Guwahati-ah political party thar hming hi puangin, an party-ah chuan state chhung hnam, pawl leh sakhaw aiawh hrang hrangte an tel tih a sawi. An party thil tum ber chu tualchhung ro inrelna hnuaia pawl leh bial hrang hrang inṭhui khawm, mitin huap zo rorelna siam leh, ram economy chungchanga intodelhte a ni, a ti. 

Saikia chuan an party chuan Assam thar siam turin theihtawp a chhuah dawn a, mitinte hnen thleng pha hmasawnna thlen tir an tum dawn tih a sawi. 

Political party thar, Rajor Dal hi United Regional Party, Assam chuan a thlawp  nghal a ni. 

KMSS dintu leh advisor ni lai, Akhil Gogoi chu jail-ah a la tang mek a, mahse kar liam ta khan National Investigative Agency (NIA) court chuan bail-a chhuah a dilna chu a remtihsak tawh a ni. Gogoi hi party tharah hian chief state convener a ni nghal ang. 

Nakkum-ah Assam hian assembly inthlan a hmachhawn dawn a, he inthlana chuh tum hian tun hnaiah political party thar pali a ding ta a ni. Party thar dinte hi an vaiin CAA dodaltu vek an ni. 

Congress leh AIUDF chuan nakkum assembly inthlan neih tura thawhdunna tur an tifel. 

Assam chief minister hlui leh Congress hruaitu, Tarun Gogoi chuan AIUDF nena thawhdun an duh thu hi a lo sawi tawh a, anni chauh ni loin Assam-a BJP duhlotu party hrang hrangte chu thawhpui an inhuam thu a sawi.  

Gogoi chuan Assam-ah BJP duh lohna thlipui a tleh mek nia sawiin, a bikin ṭhalai, loneitu, tribal leh Bengali-te chuan BJP sorkar hian a bumah an ngai tawh a, hei vang hian BJP sorkar paihthlak a nih ngei theihna turin mipuite chuan ṭangrual pawl lian leh chak tak a awm an duh a ni, a ti.